— लामो समयदेखि तलब नपाएको भन्दै धरानस्थित बीपी कोइराला स्वास्थ्य विज्ञान प्रतिष्ठानअन्तर्गत अस्पताल फार्मेसीमा कार्यरत कर्मचारीले फार्मेसी सेवा ठप्प पारेका छन् । उनीहरूको आन्दोलनका कारण दुई दिनयता प्रतिष्ठानको फार्मेसी बन्द हुँदा बिरामी मर्कामा परेका छन् ।
७ महिनादेखि तलब र सेवासुविधा नपाएको भन्दै फार्मेसीमा कार्यरत १८ जना फर्मासिष्ट र ४ जना सहयोगी सहित २२ जना कर्मचारी धर्नामा छन् । जसले गर्दा अस्पतालको फार्मेसीबाट पाउने स्वास्थ्य बिमा अन्तर्गतको औषधी नपाउँदा बिरामीहरू मारमा परेका हुन् ।
चौबिसै घण्टा सेवा उपलब्ध हुनुपर्ने फार्मेसीबाट सेवा नपाउँदा बिरामीका आफन्तजनहरू बाहिरको पसलबाट महँगो शुल्क तिरेर औषधी किन्न बाध्य भएको आफन्तको उपचारका लागि प्रतिष्ठान पुगेका इटहरीका सौरभ श्रेष्ठले जानकारी दिए । प्रतिष्ठानको फार्मेसीमा औषधि व्यवस्थापनको जिम्मा केटीएम सेक्युरिटी सर्भिसेज प्रालिले गर्दै आएको छ । त्यहाँ कार्यरत कर्मचारीहरू केटीएम सेक्युरिटीमार्फत भर्ना भएका हुन् । उनीहरूलाई तलब सुविधा दिने दायित्व पनि उक्त कम्पनीकै भए पनि तलब नपाएपछि बाध्य भएर आन्दोलनमा उत्रनुपरेको एक कर्मचारीले बताइन् ।
यसैबीच प्रतिष्ठानले फार्मेसी सेवा अवरुद्ध हुनु गैरकानुनी भएको दाबी गर्दै आपूर्ति कम्पनी केटीएम सेक्युरिटी सर्भिसेज प्रालिले गैरकानुनी कार्य गरेको जनाएको छ । प्रतिष्ठानजस्तो संवेदनशील क्षेत्रको सेवा एकाएक बन्द गर्नु प्रचलित कानुनको उल्लङ्घन भएको सह प्रवक्ता डा. अभिजित कुमारद्वारा हस्ताक्षरित विज्ञप्तिमा उल्लेख छ ।
२०७० सालमा तीन वर्षका लागि सम्झौता गरिएको सो कम्पनीसँग हालसम्म सेवा निरन्तरता दिइँदै आएको तर, कुनै पूर्व जानकारी नदिई फार्मेसी सेवा बन्द गरिएको भन्दै प्रतिष्ठानले आपत्ति जनाएको छ । फार्मेसीमा कार्यरत जनशक्तिको लापरबाहीका कारण संस्थाको छवि धूमिल भएको भन्दै प्रतिष्ठानले चिन्ता व्यक्त गरेको छ । सम्झौताका सर्तअनुसार आपूर्ति गरिएका कर्मचारीले जिम्मेवारी कुशलतापूर्वक निर्वाह नगरेमा कम्पनीले तत्काल नयाँ व्यवस्था गर्नुपर्ने भए पनि केटीएमले त्यसो नगरेको प्रतिष्ठानले जनाएको छ ।
