: सडकको ट्र्याक खुलेको झन्डै ३० वर्ष भयो । यही सडकलाई राजनीतिक दलले नारा बनाए । स्तरोन्नति र कालोपत्रे गरिदिने बाचा गरे । तर, अहिले पनि सुर्खेतको पश्चिम क्षेत्रलाई जोड्ने बड्डीचौर–खम्बागाडे सडकखण्डको हालत उस्तै छ । अर्थात् यो सडकमा नागरिकलाई सुविधाभन्दा सास्ती बढी छ । हालसम्म पनि यो सडक कालोपत्रे हुन सकेको छैन ।
ट्र्याक खुलेको वर्षौंसम्म स्तरोन्नति हुन सकेन । पछिल्लो समय मदन भण्डारी राजमार्गमा समेटिएपछि यो सडकको स्तरोन्नति हुने अपेक्षा गरिएको थियो । तर, राजमार्गमा समेटिए पनि यो खण्डमा स्तरोन्नतिको काम हुन सकेन । सडकमा पर्ने रूख कटानको अनुमति नपाउँदा निर्माणको काम नै रोकियो । बड्डीचौर–खम्बागाडे सडकको जम्मा दूरी केबल १३ किलोमिटर छ । यो खण्डको स्तरोन्नतिका लागि भन्दै २०७९ सालमा नै ठेक्का लागेको थियो । सरासर काम भएको भए २०८१ सालमा नै यो सडक कालोपत्रे भइसक्थ्यो । तर, रूख काट्ने अनुमति नपाउँदा निर्माणको काम नै अलपत्र परेको हो ।
लामो कसरतपछि बल्ल यो सडकमा पर्ने रूख काट्ने अनुमति मिलेको छ । अर्थात् सडक स्तरोन्नतिका लागि ठेक्का लागेको तीन वर्षपछि आएर सडकमा पर्ने रूख काट्ने अनुमति मिलेको हो । तीन वर्षअघि नै ठेक्का लागेको भए पनि रूख कटानको अल्झनका कारण काम अगाडि बढ्न सकेको थिएन । तर, अब भने सडक स्तरोन्नतिको कामले गति लिने अपेक्षा गरिएको छ । केही दिनअघि मात्र यो सडकमा पर्ने रूख कटानका लागि त्रिपक्षीय सम्झौता भएको छ । वन तथा भू–संरक्षण विभाग, कर्णाली प्रदेशको पूर्वाधार विकास निर्देशनालय र मदन भण्डारी राजमार्ग आयोजना निर्देशनालयबीच रूख कटानको सम्झौता भएको हो ।
अब यो सडकमा रोकिएको स्तरोन्नतिको काम अगाडि बढ्नेछ । सम्झौताअनुसार यो सडकमा पर्ने विभिन्न प्रजातिका ८६४ वटा रूख काट्ने बाटो खुलेको छ । सरकारले रूख कटानको अनुमति दिएसँगै अब काम अगाडि बढ्ने पूर्वाधार विकास निर्देशनालय सुर्खेतका प्रमुख सूर्यबहादुर शाहीले बताए । उनले भने, ‘यो सडकको स्तरोन्नतिका लागि २०७९ सालमै ठेक्का आह्वान भएको थियो, तर रूख कटानको अल्झन् थियो । अब भने सडकमा पर्ने रूख कटानको प्रक्रिया अगाडि बढ्छ, यो आर्थिक वर्षभित्रमा कालोपत्रेको काम सकिन्छ ।’ ठेक्का सम्झौताअनुसार २०८१ सालमा नै यो सडक कालोपत्रे भइसक्नुपर्ने थियो । तर, काममा अवरोध भएका कारण २०८३ साल असारसम्मका लागि म्याद थप गरिएको छ ।
पूर्वाधार विकास निर्देशनालयका अनुसार हालसम्म यो सडकको भौतिक प्रगति जम्मा २५ प्रतिशत छ । मदन भण्डारी राजमार्गमा परेको भए पनि यो खण्डको निर्माणमा प्रदेश सरकारले लिएको छ । यो सडकका लागि प्रदेश सरकारले ४२ करोड बजेट विनियोजन गरेको छ । रूख कटान नहुँदा अहिले बड्डीचौर बजारदेखि गिभिनेसम्म झन्डै ६ किलोमिटर र खम्बागाडेतर्फ एक किलोमिटर सडकमा नाला, सपोर्टवाल र कल्भर्ट निर्माण गरिएको छ । तर, ब्युरेनी क्षेत्रमा भने सडकमा रहेका रूखका कारण सडक विस्तारको काम रोकिएको थियो । २०८१ सालमै कालोपत्रे सम्पन्न गर्नुपर्ने भए पनि निर्माण कम्पनीले रूखको कारण देखाउँदै निर्माणमा ढिलाइ गरिरहेको थियो । यो सडकखण्डमा कालोपत्रे भएमा पश्चिम क्षेत्रका नागरिकलाई सहजता हुनेछ ।
ट्र्याक खुलेको झन्डै ३० वर्षपछि सुर्खेतको पश्चिम क्षेत्रलाई जोड्ने सडकमा कालोपत्रे गर्नका लागि तीन खण्डमा काम भइरहेको हो । जसमध्ये बड्डीचौर–खम्बागाडे खण्ड एउटा हो । मदन भण्डारी राजमार्ग नामाकरण गरिएको सडकको पहिलो खण्डअन्तर्गत बड्डीचौरदेखि खम्बागाडेसम्म कालोपत्रे गर्नका लागि ४२ करोड ४७ लाख ६१ हजारमा अनक जयदेवी जेभी बाँकेले सम्झौता गरेको छ । जयदेवीका सञ्चालकले अपेक्षाकृत काम गर्न नसकेपछि मुख्य निर्माण कम्पनी अनकले निर्माणको पूरै जिम्मेवारी आफैं लिएको छ । रूख कटानको काम सकेर दसैंपछि कालोपत्रेको काम अगाडि बढ्ने निर्देशनालयको भनाइ छ । बड्डीचौरलाई शून्य विन्दु मानेर तीन वर्षअघि नै यो सडकको विस्तृत परियोजना प्रतिवेदन (डीपीआर) गरिएको थियो । तर, संघ सरकारले सडक निर्माणमा चासो नदेखाएपछि कर्णाली प्रदेश सरकारले पश्चिम क्षेत्रका नागरिकलाई सहज यात्राका लागि सडक कालोपत्रे गर्ने कामको अपनत्व लिएको हो ।
