: यातायातका साधनमा प्रयोग हुने डिजेल पिउँदा उदयपुरको चौदन्डिगढी नगरपालिका ६ सुगारेका एक वृद्धको बुधबार ज्यान गएको छ।
सोमबार बेलुकी ७ बजे आफ्नै घरमा बोतलमा राखिएको डिजेल झुक्किएर पिउँदा स्थानीय ९३ वर्षीय अन्त नारायण श्रेष्ठको बुधबार उपचारको क्रममा ज्यान गएको हो।
जिल्ला प्रहरी कार्यालयका प्रमुख एसपी हरिहरनाथ योगीका अनुसार डिजेल सेवनपछि बेहोस भएका श्रेष्ठको नगर अस्पताल चौदण्डीगढीमा सामान्य उपचारपश्चात थप उपचारका लागि विराटनगरस्थित विराट टिचिङ अस्पतालमा लगिएको थियो।
दुई दिनदेखि अस्पतालको सघनकक्षमा उपचारत श्रेष्ठलाई चिकित्सकले साँझ साढे ६ बजे मृत घोषणा गरेको प्रहरीले जनाएको छ। घटनाको थप अनुसन्धान भइरहेको प्रहरीले जनाएको छ।
