: भारतको उत्तराखण्ड राज्यमा केही दिनअघि एक्कासी आएको बाढीमा परी बर्दियाको मधुवन नगरपालिका निवासी एकै परिवारका ३ जना र अन्य २ जना गरी ५ जना बेपत्ता भएका छन् । उनीहरू भारतको उत्तराखण्ड राज्य अन्र्तगत रहेको पौडी जिल्ला बाँकुडा गाउँमा मजदुरी गर्न गएको बुझिएको छ ।
बाढीमा परी मधुवन नगरपालिका वडा नम्बर ६ गाउँ नम्बर ४ निवासी अन्दाजी ३९ वर्षीय नरेन्द्र खड्का उनकी श्रीमती सरस्वती भण्डारी खड्का र नाबालक छोरा २ वर्षीय रोमन खड्का बेपत्ता भएको मधुवन नगरपालिकाका नगर प्रवक्ता मेक बहादुर गुरुङले बताए । त्यस्तै मधुवन नगरपालिका वडा नम्बर ५ गाउँ नम्बर ८ निवासी रामु परियारकी श्रीमती अमृता परियार र गुलरिया नगरपालिका संगमवस्तीस्थित सुकुमबासी टोल बस्ने अन्दाजी २०/२१ वर्षीय सुवास परियार पनि बाढीमा बेपत्ता भएको बुझिएको छ ।
उनीहरू नयाँ वर्ष मनाएर सडक मजदुरको रुपमा भारत गएको बुझिएको छ। मधुवन नगरपालिका वडा नम्बर ५ गाउँ नम्बर ८ का ठेकेदार चित्रबहादुर पौडेलमार्फत त्यहाँ पुगेको बुझिएको छ । उनले भने, 'ठेकेदार पौडेलसँग प्रहरीले सम्पर्क गर्दा सो ठाउँमा बाढी आई केही नेपाली घाइते भएको र स्थानीय मेडिकलमा औषधिउपचार भइरहेको छ । स्थानीय प्रशासनसँग समन्वय गरी बेपत्ता भएकाहरूको खोज तलास भइरहेको छ।'
मधुवन नगरपालिकाका नगरप्रमुख तेजबहादुर भाटले घटना थाहा पाउने वित्तिकै प्रहरीसहित पीडितका घरघर पुगी वस्तुस्थिती बुझेका थिए । बेपत्ता भएकाका कतिपय परिवारहरू खोजतलासको लागि घटना स्थलतर्फ गइसकेको प्रवक्ता गुरुङको भनाइ छ । नगरपालिकाले पीडितका परिवारलाई जनही २५ हजार रुपैयाँ क्रिया खर्च उपलब्ध गराउने तयारी रहेको उनले जानकारी दिए ।
