— प्रधानमन्त्री केपी शर्मा ओली सरकारको मन्त्रिपरिषद् बैठकले गरेको पहिलो निर्णय थियो, ३ सय दिनभित्र त्रिवि क्रिकेट मैदान कीर्तिपुरमा दर्शक बस्न मिल्ने प्यारापिट, रात्रिकालीन खेलका लागि फ्लडलाइट जडान गर्नेलगायत आवश्यक संचरना बनाउने ।
तोकेको समयमा भनेजस्तो काम नभए पनि यतिबेला मैदानलाई क्रिकेट रंगशालामा परिणत गर्ने काम धमाधम भइरहेको छ । सम्झौताअनुसार काम भएको भए वैशाख २४ गते सबै काम सकिएर रातिमा पनि खेल खेलाउन मिल्ने व्यवस्थित संरचना बनिसकेको हुन्थ्यो । तर, समयमा काम नसकिएपछि प्रधानमन्त्री ओलीले निर्माण कम्पनीसँग स्पष्टीकरण नै सोधे । त्यसपछि दुई महिना म्याद थप । तर काम सकिएन । समयमा काम नसकेका कारण सम्झौताअनुसार निर्माण कम्पनीले अहिले दैनिक २ लाख हाराहारीमा जरिवाना तिर्नुपर्ने हुन्छ । त्यसकारण पनि कम्पनीले धमाधम काम अघि बढाइरहेको छ ।
क्रिकेट रंगशालामा १० हजार सिट क्षमताको प्यारापिट निर्माण काठमाडौंको बिकेओआई–केसिडिसी–बिजी जेभीले गरिरहेको छ । कम्पनीका अनुसार रंगशाला पुनर्निर्माणको सम्झौताअनुसार ९० प्रतिशतभन्दा बढी काम सकिएको छ ।
१० हजार सिट क्षमताको प्यारापिटमा पूर्वतर्फ ३ हजार सिट र पश्चिमतर्फ ७ हजार सिट जडान गरिनेछ । अब केही सिट राख्ने र रेलिङको मात्र काम बाँकी छ । बाँकी काम १० दिनभित्र सकिने बिकेओआई–केसिडिसी–बिजी जेभीका प्रोजेक्ट डाइरेक्टर भरत गिरी दाबी गर्छन् ।
यता फ्लडलाइट जडानको जिम्मा पाएको ललितपुरको विशन–ईश्वरी जोइन्ट भेन्चरको काम भने सुस्त गतिमा छ । युरोपबाट आउनुपर्ने लाइटका सामग्री आउन ढिलाइ भएकाले फ्लडलाइट जडानको काम सुस्त भएको कम्पनीको भनाइ छ । अहिले कामको प्रगति विवरण ६० प्रतिशत भए पनि लाइट आएपछि जडानको काम छिटो हुने र प्रगति विवरण पनि बढ्ने विशन–ईश्वरी जोइन्ट भेन्चरका प्रतिनिधि सौरभ शाह बताउँछन् । छ वटा पोलमा फ्लडलाइट जडान गरिने छ । ‘यसका लागि युरोपबाट सामान आउँदैछ,’ साहले भने, ‘एउटा पोलमा ७० वटा लाइट जडान गर्नुपर्छ । त्यस आधारमा सबै पोलमा गरी ४२० लाइट जडान गरिनेछ । सामान आएपछि जडान गर्न समय धेरै लाग्दैन ।’
साहका अनुसार डिजाइनको परिवर्तन, बर्खासँगै पहिलो प्रस्तावित फ्लडलाइटले स्वीकृति नपाएकाले नयाँ प्रक्रियामा जाँदा ढिलो भएको हो । ‘यो नेपालका लागि नयाँ पनि भयो । लाइट आएपछि जडान हुनासाथ ९० प्रतिशत काम सकिन्छ अनि प्राविधिक पाटोमात्र बाँकी रहन्छ,’ उनले भने ।
त्रिभुवन विश्वविद्यालयसँग लिजमा लिएर नेपाल क्रिकेट संघ (क्यान) ले यो मैदानमा क्रिकेट प्रतियोगिताहरू आयोजना गर्दै आएको छ । नेपाल प्रिमियर लिग (एनपीएल)का बेला यो रंगशाला हजारौं क्रिकेटप्रेमीको उपस्थिति रहन्छ । दर्शकहरू रुखमा चढेर जोखिमपूर्ण तरिकाले क्रिकेट हेरिरहेको दृश्य भाइरल बनेपछि यहाँ प्यारापिटसहितको व्यवस्थित रंगशाला बन्नुपर्ने माग उठेको थियो । थपिएको अवधिभित्र रंगशाला बनेमा एनपीएलको दोस्रो संस्करणमा दर्शकले आनन्दसँग क्रिकेटको मज्जा लिन पाउनेछन् ।
