: भारतीय वायुसेना प्रमुख एयर चीफ मार्शल एपी सिंहले मे महिनामा भारत– पाकिस्तानबीचको सैन्य द्वन्द्वका क्रममा भारतीय सेनाले पाकिस्तानका पाँच लडाकु विमान र एउटा ठुलो विमान खसालेको दाबी गरेका छन्।
पहलगाम आक्रमणपछि मे ६–७ को राति, भारतीय सेनाले पाकिस्तान र पाकिस्तान प्रशासित कश्मीरमा रहेका अतिवादी शिविरलाई निशाना बनाएको थियो।
यो अपरेशनलाई ‘अपरेशन सिन्दूर’ नाम दिइएको थियो। यसपछि भारत र पाकिस्तानबीच सैन्य द्वन्द्व भएको हो।
मे १० मा युद्धविराम घोषणा भएपछि द्वन्द्व रोकिएको थियो। त्यतिबेला पाकिस्तानले पाँच भारतीय लडाकु विमान खसालेको दाबी गरेको थियो। यसलाई भारतले पूर्ण रूपमा अस्वीकार गरेको हो।
वायुसेना प्रमुखको यो दाबी भारतीय सेनाका दुई शीर्ष अधिकारीको बयान पछि आएको हो। यसमा केही विमान गुमाउने कुरा उल्लेख गरिएको थियो। तीमध्ये एक सीडीएस जनरल अनिल चौहान थिए र अर्को इन्डोनेसियामा भारतीय रक्षा सहचारी थिए। यद्यपि पछि भारतीय दूतावासले एक विज्ञप्ति जारी गर्दै रक्षा सहचारीको बयानलाई सन्दर्भभन्दा बाहिर उद्धृत गरिएको बताएको छ।
अपरेशन सिन्दूर र युद्धविरामको क्रममा भारतीय लडाकु विमान खसालेको विषयमा विपक्षी दलहरूले सरकारलाई निरन्तर घेरेका छन्। हालै संसद्को मनसुन सत्रमा पनि यस विषयमा बहस भएको थियो।
