— अमेरिकी राष्ट्रपति डोनाल्ड ट्रम्प र रुसी राष्ट्रपति भ्लादिमिर पुटिन आलस्कामा भेट्दै छन् । अलजजिराका अनुसार अलास्कामा स्थानीय समयअनुसार बिहान ११ : ३० बजे (नेपाली समय शनिबार बिहान सवा १ बजे) दुई नेताबीच वार्ता सुरु हुनेछ ।
रुसतर्फबाट विदेशमन्त्री सेर्गेई लाभरोभ, रक्षामन्त्री आन्द्रेई बेलोउसुभ, अर्थमन्त्री एन्टोन सिलुआनोभ, राष्ट्रपति पुटिनका सहायक युरी उशाकोभ र विशेष आर्थिक दूत किरिल दिमित्रिएभ वार्तामा सहभागी हुनेछन् । अमेरिकातर्फबाट उपराष्ट्रपति जेडी भान्स, अमेरिकी विदेशमन्त्री मार्को रूबिओ, ट्रम्पका मध्यपूर्व दूत स्टिभ विटकोफ, अर्थमन्त्री स्कट बेसेन्ट, रक्षामन्त्री पिट हेगसेथ रहनेछन्।
बहुप्रतीक्षित यो वार्ताले विश्वको ध्यान खिचेको छ । वार्तालाई दुई हिसाबले चर्चित मानिएको छ ।
पहिलो हो- रुस-युक्रेन युद्ध ।
डोनाल्ड ट्रम्पले राष्ट्रपतीय चुनावी अभियानका क्रममा आफू राष्ट्रपतिमा विजयी भए २४ घण्टामै रुस-युक्रेन युद्ध अन्त्य गर्ने भनेका थिए । तर उनी निर्वाचित भएको ९ महिना बितिसक्दा पनि उनले आफ्नै भनाइ पूरा गर्न सकेका छैनन् ।
ट्रम्पले युद्धविरामका लागि पहल नगरेका भने होइनन् । उनले युक्रेनका राष्ट्रपति भोलोदिमिर जेलेन्स्कीलाई व्हाइट हाउसमै बोलाएर वार्ता गरेका थिए । तर त्यो वार्ता सफल हुन भने सकेन । बरु राष्ट्रपति जेलेन्स्कीसँग देखाएको स्वभावका कारण उनी विश्वभर आलोचित बन्न पुगे ।
निर्वाचित भएपछि ट्रम्प पहिलोपटक पुटिनलाई भेट्दै छन्, जसकारण पनि भेटलाई चासोपूर्वक हेरिएको छ । यो वार्तामा उनले युद्धविरामबारे छलफल गर्ने बताइसकेका थिए । युद्धविराममा सहमति नगरे रुसले गम्भीर परिणाम भोग्नुपर्ने चेतावनी समेत दिएका छन् । त्यसकारण पनि युद्धविरामबारे सहमति हुने अपेक्षा गरिएको छ ।
दोस्रो महत्वपूर्ण हुनुको दोस्रो कारण हो- भेटघाटस्थल, अलास्का ।
अलास्का पहिले रुसको एक हिस्साको रुपमा चिनिन्थ्यो । अलास्का विगत १५० वर्षदेखि अमेरिकाको हिस्साका रुपमा रहँदै आएको छ । १८औँ शताब्दीमा रुसी साम्राज्यले उपनिवेश बनाएपछि सन् १८६७ मा रुसले ७.२ मिलियन डलरमा अमेरिकालाई बेचेको थियो । यो रुसको सबैभन्दा नजिकको अमेरिकी भूभाग हो । जसकारण आज पनि अलास्कामा रुसी संस्कृतिका अवशेषा देखिन्छन् ।
भेटवार्ता आलास्कामै किन ?
दुई राष्ट्रपतिको अलास्कामा हुने भेट एक कूटनीतिक निर्णय रहेको विश्लेषकहरु बताउँछन् । अलास्का र रुसबीचको दुरी केवल ८८ किलोमिटर मात्रै छ । जसले पुटिनलाई सहजै बनाएको एकातर्फको तर्क छ ।
अर्कोतर्फ अमेरिका अन्तर्राष्ट्रिय फौजदारी अदालत (आईसीसी) को सदस्य होइन । पुटिनविरुद्ध आइसीसीको वारेन्ट भएका कारण पनि यो सुरक्षित स्थानका रुपमा लिइएको छ । अलास्कामा ट्रम्पसँग भेटका लागि पुटिन दशकपछि अमेरिकी भूमिमा टेक्न लागेका हुन् ।
