। भौतिक पूर्वाधार तथा यातायातमन्त्री देवेन्द्र दाहाल र मन्त्रालयका सचिव केशवकुमार शर्माबीच कार्यसम्पादन सम्झौता भएको छ ।
मंगलबार मन्त्रालयमा भएको कार्यसम्पादन सम्झौता कार्यक्रममा मन्त्री दाहालले सम्झौतामा उल्लेखित लक्ष्य प्राप्तिका लागि आवधिक लक्ष्य र योजना तर्जुमा गर्न निर्देशन दिए ।
‘सम्झौतामा मूलभूत लक्ष्य समेटिएका छन्,’ मन्त्री दाहालले भने, ‘प्रधानमन्त्रीले मन्त्रीहरूसँग सम्झौता गर्नुभएको छ, त्यही अनुसार आज मन्त्री र सचिवबीच सम्झौता भयो । यसलाई मार्गदर्शन ठानेर लक्ष्य प्राप्तिमा लाग्नु हुनेछ भन्ने विश्वास छ ।’
सडक विभाग, यातायात व्यवस्था विभाग, रेल विभाग तथा पानी जहाज कार्यालयलाई उच्च नतिजा हासिल हुने गरी कार्यसम्पादन गर्न उनले निर्देशन दिए ।
मन्त्रालयका सचिव शर्माले कुन महिना कति परिणाम निकाल्ने हो, सोही अनुसार लक्ष्य निर्धारण गरी कार्यसम्पादन गर्न विभागीय प्रमुख तथा महाशाखा प्रमुखहरूलाई निर्देशन दिए । सम्झौतामा उल्लेखित नतिजा सूचक प्राप्त हुने गरी माइलस्टोन अनुसार काम गर्न उनले भनेका छन् ।
२९ साउनमा प्रधानमन्त्री र मन्त्रीहरूबीच कार्यसम्पादन सम्झौता भएको थियो । सोही अनुसार मन्त्री र सचिवबीच सम्झौता भएको र अब सचिव तथा विभागीय प्रमुख एवं महाशाखा प्रमुखहरूबीच सम्झौता गरिने मन्त्रालयका सहसचिव बलराम रिजालले जानकारी दिए ।
