: जंगली बाँदर र बँदेलका कारण जनताले दुःख पाइरहेको भन्दै त्यसलाई नियन्त्रण गर्न नुवाकोटवासीले बागमती प्रदेशका वन तथा वातावरण मन्त्रीसमक्ष माग गरेका छन्। बाँदर र बँदेलले बालीनाली नष्ट गर्नुका साथै भौतिक क्षतिसमेत गर्न थालेपछि यसको प्रभावकारी नियन्त्रण आवश्यक रहेको वनमन्त्री भरतबहादुर केसीसमक्ष नुवाकोटवासीले माग गरेका हुन्।
विदुरस्थित डिभिजन वन कार्यालय नुवाकोटमा आयोजित अन्तरक्रियामा सहभागीहरूले पछिल्लो केही वर्षदेखि नुवाकोटका अधिकांश ग्रामीण भेग र शहरी क्षेत्रमा समेत जंगली बँदेल र बाँदरका हुलले खेती किसान गरिरहेका र सर्वसाधारणको खाद्यान्नवालीमा नोक्सान पुर्याउनुका साथै आक्रमणसमेत गर्न थालेको गुनासो गरे।
मन्त्री केसीलाई जङ्गली बँदेल र बाँदरहरूले किसानहरूको बालीनाली नष्ट गरी पुर्याएको समस्याले ठूलो रूप लिँदै गएको अवगत गराएका हुन्। बाँदर र बँदेलकै कारण कतिपय स्थानमा मानिसहरू गाउँ छाड्नुपर्ने बाध्यतामा पुगेकासमेत सहभागीहरूले मन्त्री केसीलाई बताए।
मन्त्री केसीले बाँदर नियन्त्रण गर्नका लागि नीति बनाई सकिएको दाबी गरे। उनले पीडित किसानहरूलाई बाँदर नियन्त्रणका लागि विशेष र प्रभावकारी कानुन आएको र यसको केही प्रक्रिया रहेको समेत बताए। मन्त्री केसीले बाँदरहरू बढ्नुको कारण विगतमा जंगली जनावरहरूले खाने कुराहरू पनि नास हुँदै गएको कारणले बाँदरहरू वृद्धि भएर बजारसमेत पसेको बताए।
पहिले जंगलमै फलफूल तथा गिट्टाभ्याकुरहरू हुने भए पनि अहिले ती मासिएका कारण बाँदर बस्ती तथा बजार पसेको बताए। अब बाँदर र बँदेल नियन्त्रणका लागि पनि सरकारले नीति ल्याइसकेको बताउँदै मन्त्री केसीले यसको विधि र प्रक्रिया बुझ्नुपर्ने बताए।
