: नेकपा एमालेका महासचिव शंकर पोखरेलले विधान अधिवेशनमा सहभागी हुने प्रतिनिधिबाट शुल्क नउठाउने बताएका छन्। विधान महाधिवेशनको तयारी र समसामयिक विषयमा जानकारी गराउन आयोजित पत्रकार सम्मेलनमा महासचिव पोखरेलले महाधिवेशनमा खर्च कति हुन्छ भन्ने अनुमान गर्न हतार हुने बताएका छन्।
भदौ २० गतेदेखि २२ गतेसम्म गोदावारीमा एमालेको दोस्रो विधान महाधिवेशन हुँदैछ। दोस्रो विधान महाधिवेशनमा २०२६ जना प्रतिनिधि र आयोजकका हैसियतमा ३१५ जना थप गरी २ हजार ३४१ जना सहभागी रहनेछन् ।
महासचिव पोखरेलले विधान महाधिवेशन राजनीतिक, विधान संशोधन, सांगठनिक प्रस्ताव र विभागले प्रतिवेदन पेश गर्ने जानकारी गराए। ‘अधिवेशनमा पार्टीका तर्फबाट अध्यक्ष एवं सम्माननीय प्रधानमन्त्री केपी शर्मा ओलीद्वारा राजनीतिक प्रतिवेदन, पार्टीका उपाध्यक्ष एवं उपप्रधानमन्त्री तथा अर्थमन्त्री विष्णुप्रसाद पौडेलद्वारा विधान संशोधन सम्बन्धी प्रस्ताव र महासचिव शंकर पोखरेलद्वारा संगठनात्मक प्रतिवेदन प्रस्तुत हुने छ ।’ उनले भने, ‘त्यसैगरी केन्द्रीय अनुशासन आयोग, केन्द्रीय लेखा आयोग, केन्द्रीय निर्वाचन आयोग र केन्द्रीय सल्लाहकार परिषदबाट प्रतिवेदन प्रस्तुत गर्नुहुने छ।’
प्रस्तुत प्रतिवेदनहरु उपर महाधिवेशनमा सहभागी प्रतिनिधिहरुबीच समूहगत छलफल गर्ने व्यवस्था मिलाइएको छ। केन्द्रीय कमिटीका दुई जना उपाध्यक्षको फरक मत आएको उनले बताए। उनले फरक मतलाई सम्बन्धित अधिवेशनमा छलफल गरिने वैधानिक व्यवस्था रहेकाले निर्णयमाथि मात्र हाल असहमति रहेको बुझाइ रहेको बताए। उनले केन्द्रिय कमिटीको निर्णयमाथि छलफल हुने विधान अधिवेशनमा नभएको उनको भनाई छ।
