: अमेरिकी राष्ट्रपति डोनाल्ड ट्रम्पले युरोपेली संघलाई चीन र भारतमाथि १०० प्रतिशतसम्मको भन्सार कर लगाउन अपील गरेका छन्।
ट्रम्प र युरोपेली संघबीचको वार्तासँग परिचित एक स्रोतले बीबीसीलाई यो जानकारी दिएको हो।
ट्रम्पले रुसी राष्ट्रपति भ्लादिमिर पुटिनलाई युक्रेनमा युद्ध अन्त्य गर्न बाध्य पार्ने आफ्नो प्रयासको एक भागको रूपमा यो अपील गरेका हुन्।
मंगलबार अमेरिका र ईयूका अधिकारीबीच रुसमाथि आर्थिक दबाब बढाउने विकल्पमा भएको वार्तामा ट्रम्पले यो माग गरेका हुन्।
ट्रम्प रुस र युक्रेनबीच शान्ति सम्झौता ल्याउन संघर्ष गरिरहेका बेला यो प्रस्ताव आएको हो। अर्कोतर्फ रुसले युक्रेनमाथि आक्रमण तीव्र पारेको छ।
ट्रम्पको प्रस्ताव अघि अमेरिकी अर्थमन्त्री स्कट बेसान्टले अमेरिका आर्थिक दबाब बढाउन तयार रहेको बताएका थिए। तर यसलाई बलियो युरोपेली समर्थन चाहिने उनको भनाइ छ।
ट्रम्पले आफू अर्को हप्ताको सुरुमा पुटिनसँग फोनमा कुरा गर्ने योजनामा रहेको बताएका छन्। उनले भारत र अमेरिकाले व्यापार अवरोध समाधान गर्न वार्ता जारी राखेको र आगामी हप्तामा प्रधानमन्त्री नरेन्द्र मोदीसँग भेट्ने योजना रहेको पनि बताए।
