: नेपालका विभिन्न कारागारबाट फरार भएका कैदीबन्दीहरू नुवाकोटमा धमाधम पक्राउ परेका छन् । विशेषगरी काठमाडौं र रसुवाबाट फरार भएका कैदीबन्दीहरूलाई पक्राउ गरेर केन्द्रीय कारागार नुवाकोटमा राखिएको छ ।
जेन–जीको प्रदर्शनको क्रममा भदौ २४ र २५ गते कारागारबाट फरार भएकामध्ये नुवाकोटबाट हालसम्म एक सय जना कैदीबन्दी पक्राउ गरेर चण्डीपोखरीस्थित केन्द्रीय कारागार नुवाकोटमा राखिएको हो । उनीहरूलाई विभिन्न स्थानबाट पक्राउ गरेर कारागारमा राखिएको नुवाकोटका प्रमुख जिल्ला अधिकारी शशीधर घिमिरेको भनाइ छ ।
उनका अनुसार काठमाडौं, रसुवालगायतका कारागारबाट फरार भएका विभिन्न मुद्दामा दोषी ठहर भई कैद भुक्तान गरिरहेका कैदीबन्दीहरू नुवाकोटका विभिन्न स्थानवाट पक्राउ गरिएको हो । उनीहरूलाई विदुर नपा ६ चण्डीपोखरीस्थित केन्द्रीय कारागारमा विशेष सुरक्षाका साथ राखिएको छ ।
केन्द्रीय कारागार नुवाकोटमा यसअघि नै ७ सय ५० जना कैदीवन्दी राखिएका थिए । उक्त कारागारमा शुक्रबार बेलुकी पनि अन्य स्थानबाट धमाधम फरार कैदीबन्दीहरू पक्राउ गरेर ल्याउने क्रम जारी रहेको छ ।
