– डिफेन्डिङ च्याम्पियन लिभरपुलले इंग्लिस प्रिमियर लिगमा १० खेलाडीमा सीमित बर्नलीलाई १–० ले पराजित गरेको छ । मोहम्मद सलाहले दोस्रो हाफको इन्ज्युरी समयको पाँचौं मिनेटमा पेनाल्टीबाट निर्णायक गोल गरेका थिए । टर्फ मुरमा भएको यो खेलको नतिजापछि लिभरपुलको शतप्रतिशत सुरुआत कायम राख्दै फेरि लिग तालिकाको शीर्षमा उक्लेको छ ।
यो नतिजापछि लिभरपुलको ४ खेलबाट १२ अंक भएको छ । बर्नली खेलको अन्त्यमा १० खेलाडीमा सीमित रह्यो । लेस्ली युगोचोक्वु रातो कार्ड खाएर मैदान छाड्न बाध्य रहे । बर्नलीको ४ खेलबाट ३ अंक छ ।
आइतबारकै अर्को खेलमा .म्यानचेस्टर डर्बीमा सिटीले युनाइटेडलाई ३–० ले पराजित गरेको थियो । इतिहाद स्टेडियममा भएको खेलमा फिल फोडेनले सिटीलाई १८ औं मिनेटमा गोल गर्दै अग्रता दिलाए । त्यसमा इर्लिङ हालान्डले ५३ औं र ६८ औं मिनेटमा दुई गोल थपेका थिए ।
त्यसअघि फाबियो कार्भाल्होले दोस्रो हाफको इन्ज्युरी समयको तेस्रो मिनेटमा गोल गरेपछि ब्रेन्टफोर्डले शनिबार चेल्सीलाई २–२ को बराबरीमा रोकेको थियो । मोसे काइसेडोले ८५ औं मिनेटमा गोल गर्दै चेल्सीलाई २–१ ले अगाडि राखेपछि टिम विजयतर्फ अग्रसर देखिएको थियो ।
यसअघि केभिन स्चाडेको गोलमा ब्रेन्टफोर्डले अग्रता लिएपछि कोल पाल्मरले बराबरी गोल फर्काएका थिए । यो यो नतिजापछि चेल्सी ८ अंकसहित पाँचौं स्थानमा छ । टोटनहमले वेस्ट ह्यामलाई ३–० ले पराजित गरेको थियो । ४ खेलमा तेस्रो जित हात पारेर टोटेनहम तेस्रो स्थानमा उक्लेको छ ।
