। अर्थमन्त्री रामेश्वर खनालले जेनजी आन्दोलनका दौरान आगजनी भएका निजी क्षेत्रका भवनहरूको स्थलगत अवलोकन गरेका छन् ।
मंगलबार मन्त्री खनाल, अर्थसचिव घनश्याम उपाध्यायसहितको टोलीले आगजनी गरिएका व्यापारिक भवन र स्थल पुगेर अनुगमन गरेको हो । सचिव उपाध्यायका अनुसार मंगलबार थापाथलीस्थित गाडीका शोरुमहरू अवलोकन गरिएको छ ।
थापाथलीमा टाटा, सीजी मोटर्स, महिन्द्रा, हुन्डाई लगायतका शोरुममा आगजनी गर्दै गाडीमा क्षति पुर्याइएको छ ।
यसैगरी कोटेश्वरस्थित भाटभटेनी पुगी मन्त्रीसहितको टोलीले स्थलगत अनुगमन गरेको छ । सो क्रममा मन्त्री खनालले निजी क्षेत्रको मनोबल उकास्ने गरी सरकारले काम गर्ने आश्वासन समेत दिएका छन् ।
मन्त्री खनालसहितको टोलीले कान्तिपुर मिडिया ग्रुपको कार्यालयको समेत अवलोकन गरेको छ । साथै तीनकुनेस्थित अन्नपूर्ण पोस्टको कार्यालयमा समेत अर्थमन्त्रीले स्थलगल अनुगमन गरेका छन् ।
उता, आजै मन्त्रालयमा निजी क्षेत्रका प्रतिनिधिसँग अर्थमन्त्री खनालले छलफल र अन्तरक्रिया समेत गरेका छन् ।
सोमबार पदभार ग्रहणपछि पनि अर्थमन्त्रीले निजी क्षेत्रसँग छलफल गरेका थिए ।
अर्थमन्त्री खनालले अर्थ मन्त्रालय आम जनतासँग प्रत्यक्ष नजोडिने भन्दै आफ्नो ध्यान निजी क्षेत्रको आत्मबल उठाउन केन्द्रित गर्ने बताएका छन् ।
