बलिउड निर्माता-निर्देशक करण जोहरले पनि अनुमतिबिना आफ्नो फोटो, आवाज र अन्य व्यक्तिगत प्रतीक प्रयोग नगर्न माग गर्दै दिल्ली उच्च अदालतमा निवेदन दायर गरेका छन् ।
समाचार एजेन्सी पीटीआईका अनुसार जोहरले व्यक्तित्व अधिकारको संरक्षणको माग गर्दै उनले दिल्ली उच्च अदालतमा निवेदन दायर गरेका हुन् । उनले आफ्नो नाममा अवैध रूपमा सामान बेच्नबाट मानिसलाई रोक्न माग गरेका छन् ।
जोहरले सोमबार आफ्नो पहिचान र प्रचार अधिकारको सुरक्षाको लागि दिल्ली उच्च अदालतमा निवेदन दिएका हुन् । जोहरको यो निवेदन न्यायाधीश मनमीत पीएस अरोरा समक्ष सुनुवाइको लागि पुगेको छ ।
आफ्नो व्यक्तित्व र प्रचार अधिकारको संरक्षणबाहेक, जोहरले अदालतलाई केही वेबसाइट र प्लेटफर्मलाई आफ्नो नाम र तस्वीर भएका मग र टी-सर्ट लगायतका सामान अवैध रूपमा नबेच्न निर्देशन दिने आदेश दिन पनि अदालतलाई अनुरोध गरेका छन् ।
यस मुद्दामा ऐश्वर्या राय र अभिषेक बच्चनले पनि दिल्ली उच्च अदालतबाट राहत पाएका छन् । अदालतले अनलाइन प्लेटफर्मलाई अभिनेताको नाम, तस्वीर र आवाज उनको अनुमति बिना प्रयोग गर्न प्रतिबन्ध लगाएको छ ।
यसबाहेक, अभिषेकको एआई जेनेरेटेड तस्वीरको प्रयोगमा पनि प्रतिबन्ध लगाइएको छ ।
ऐश्वर्या र अभिषेकभन्दा पहिले अभिनेता ज्याकी श्राफले पनि यस वर्षको मे महिनामा अदालतमा निवेदन दिएका थिए । उनले आफ्नो छवि र भिडियो परिवर्तन गरेर अनुमति बिना सामान बेचिएको आरोप लगाएका थिए । अदालतले उनको व्यक्तित्व र प्रचार अधिकारको पनि रक्षा गरेको थियो ।
सन् २०२३ मा, अदालतले अनिल कपूरको छवि, आवाज र उनको ’झकास’ क्याचफ्रेजको दुरुपयोगमा प्रतिबन्ध लगाएको थियो । नोभेम्बर २०२२ मा, अमिताभ बच्चनको व्यक्तित्व र प्रचार अधिकार पनि सुरक्षित गरिएको थियो ।
