: जेनजी आन्दोलनको क्रममा इटहरी उपमहानगरपालिका कार्यालयमा लगाइएको आगो र तोडफोडका घटनाबाट पूर्णरूपमा क्षति पुगेको कार्यालयले अब दैनिक सेवा सुचारु गर्ने तयारी गरेको छ।
मंगलबार उपमहानगरको कार्यपालिका बैठकले भदौ २४ गतेको आगलागीमा ध्वस्त बनेको कार्यालय प्राङ्गणमै बसेर असोज ४ गतेदेखि सेवा सञ्चालन गर्ने निर्णय गरेको प्रमुख प्रशासकीय अधिकृत मीनबहादुर भट्टराईले जानकारी दिए।
उनले कार्यालय सञ्चालनमा चाहिने सामग्रीहरू वडा र शाखा–महाशाखाहरूले तत्काल तयार गरेर प्रमुख प्रशासकीय अधिकृतलाई बुझाउन निर्देशन दिइएको बताए। त्यसपछि क्षति नभएका आधारभूत स्वास्थ्य चौकी र आवश्यक कागजी कामका आधारमा सेवा सुचारु गरिने तयारी भइरहेको भट्टराई बताए।
आगलागी र तोडफोडबाट करिब ३० करोड रुपैयाँभन्दा बढीको क्षति भएको प्रारम्भिक अनुमान गरिएको छ। घटनामा कार्यालयका महत्त्वपूर्ण कागजात, कम्प्युटर, ल्यापटप, बारुणयन्त्र, जेसीभी, ट्याक्टर र स्कार्पियोसहितका सवारी साधनमा क्षति पुगेको छ।
कार्यालय जलेर खरानी भएपछि कर्मचारीमा त्रास फैलिएको छ। धेरै कर्मचारीहरू अझै पनि मानसिक रूपमा काम गर्न तयार छैनन्। कर्मचारीले काम गर्ने वातावरण सुरक्षित र शान्तिपूर्ण बनाउन माग गर्दै आएका छन्। उनीहरूले घटना दोहोरिन नदिन थप सुरक्षा व्यवस्था मिलाउन, सीसीटीभी जडान गर्न र कार्यालय परिसरलाई सुरक्षित क्षेत्र घोषणा गर्न माग गरेका छन्।
नगरवासी र व्यापारीहरूले पनि कार्यालयमा भएको विनाशप्रति आक्रोश प्रकट गर्दै दोषीलाई छिट्टै पक्राउ गरी कानूनी कारबाही गर्न दबाब दिएका छन्। स्थानीयवासीले भने, ‘करोडौंको सम्पत्ति जलेर खरानी हुँदा पनि दोषी खुलेआम हिँड्न दिनु अपराधलाई संरक्षण गर्नु हो।’
मेयर हेमकर्ण पौडेलले नगरवासीलाई ढुक्क रहन आग्रह गर्दै भने, ‘हामी असोज ४ गतेदेखि दैनिक सेवा सुचारु गरेर नागरिकलाई पायक पर्ने व्यवस्था मिलाउनेछौँ। दोषी पहिचान गर्न प्रहरीलाई सहयोग भइरहेको छ र कसैले पनि उन्मुक्ति पाउने छैन उनले भने।’
