: वीरगन्ज भन्सार कार्यालयले गत भदौ महिनामा लक्ष्यको ९४ प्रतिशत मात्रै राजस्व संकलन गर्न सकेको छ। अन्तिम सातामा जेनजी आन्दोलनका कारण भन्सार कार्यालयका कामकाज प्रभावित हुँदा वीरगन्ज भन्सार कार्यालयले राजस्वको लक्ष्य पुरा गर्न नसकेको हो।
वीरगन्ज भन्सार कार्यालयले गत भदौ महिनामा लक्ष्यको ९४ प्रतिशत मात्रै अर्थात २० अर्ब ५२ करोड रुपैयाँ मात्रै राजस्व संकलन गरेको भन्सार कार्यालयका प्रमुख भन्सार प्रशासक विष्णुप्रसाद ज्ञवालीले जानकारी दिए। भन्सार विभागले गत भदौ महिनाका लागि २२ अर्ब ५ करोडको लक्ष्य दिएकोमा लक्ष्य भन्दा ६ प्रतिशत कम अर्थात १ अर्ब ५३ करोड कम राजस्व संकलन भएको उनले बताए।
भदौ अन्तिम साता जेनजी आन्दोलनका कारण वीरगन्जमा लगाइएको कर्फ्यु, निषेधाज्ञा लगायतका कारणले भन्सार कार्यालयको नियमित कामकाज प्रभावित भएकाले मासिक राजस्व असुलीको लक्ष्य पुरा गर्न नसकिएको ज्ञवालीले बताए। उनले भने, ‘जेनजी आन्दोलन र प्रदर्शनका कारणले भदौ २४ र २५ गते दुई दिन त भन्सार कार्यालय बन्द भयो। त्यसपछिका दुई दिन पनि कार्यालयको काम आंशिक रूपमा प्रभावित हुन पुग्यो। यी कारणले राजस्व असुलीको लक्ष्य भेट्याउन सकिएन।
यसअघि गत साउन महिनामा पनि वीरगन्ज भन्सार कार्यालयले राजस्व असुलीको लक्ष्य पुरा गर्न सकेको थिएन। भन्सार विभागले गत साउनमा २० अर्ब ९८ करोडको लक्ष्य दिएकोमा वीरगन्ज भन्सारले लक्ष्यको ८८ प्रतिशत मात्रै अर्थात १८ अर्ब ४३ करोड मात्रै राजस्व संकलन गर्न सकेको थियो।
अन्तर्राष्ट्रिय कारोबारका प्रमुख नाकामा रहेका वीरगन्ज भन्सार कार्यालयले विगत केही वर्ष यतादेखि राजस्व संकलनको लक्ष्य पुरा गर्न सकेको छैन। गत आर्थिक वर्ष २०८१/८२ मा पनि लक्ष्यको ८१ प्रतिशत मात्रै राजस्व संकलन गरेको थियो।
