: नेपाल क्रिकेट संघ (क्यान)ले युनिटी कप खेल्ने नेपाली टोलीलाई विदाई गरेको छ। क्यानले बिहीबार टियु क्रिकेट मैदानमा एक कार्यक्रम आयोजना गर्दै युएईमा हुने युनिटी कप खेल्न जाने खेलाडीलाई विदाई गरेको हो।
विदाईका क्रममा विश्वकप छनोट खेल्नुअघि राम्रो तयारीका रूपमा युनिटी कपलाई लिएको कप्तान रोहित पौडेलले बताए। उनले भने, 'यो सिरिज हाम्रो लागि राम्रो तयारी हुन सक्छ। विश्वकप छनोटका खेल अगाडि यो सिरिजले निकै राम्रो तयारी हुनेछ।'
नेपाली क्रिकेट टिमले अस्ट्रेलियामा टप एण्ड टी-२० सिरिजका लिएर आएको थियो। उक्त सिरिज र त्योभन्दा अगाडि भारतमा गएर गरेको प्रशिक्षणले नेपाली टोली तयार रहेको कप्तान रोहितले बताए। 'हामीले अस्ट्रेलियामा सिरिज खेलेर आएका थियौं। एक महिना अगाडि अस्ट्रेलियामा र त्यस अगाडि भारतमा गरेको प्रशिक्षणका कारण हामी राम्रो लयमा रहेका छौं। त्यसका कारण हामीले राम्रो खेल्नेमा म विश्वस्त छु। हामी एकदमै उत्साहित पनि छौं,' उनले भने।
नेपाली राष्ट्रिय टिमका प्रमुख प्रशिक्षक स्टुअर्ट ल सिधै युएई पुग्ने क्यानले जनाएको छ। नेपाली टिमको साथमा हालः सहायक प्रशिक्षकको रूपमा ज्ञानेन्द्र मल्ल जानेछन्। विदाईका क्रममा सहायक प्रशिक्षक ज्ञानेन्द्र मल्लले भने, 'टेस्ट राष्ट्रसँग खेल्न पाउनु हाम्रो लागि निकै राम्रो अवसर हो। यो अवसरलाई सदुपयोग गर्दै हामी विश्वकप छनोट हुन चाहन्छौं।'
