अमेरिकी राष्ट्रपति डोनाल्ड ट्रम्पले आफ्नाविरुद्ध बोल्ने मिडियाको लाइसेन्स खोस्न सकिने बताएका छन्।
गत हप्ता लेट नाइट टेलिभिजनका प्रस्तोता जिमी किमलले प्रस्तुत गरेको भिडियो सामाग्री पश्चात् अमेरिकन प्रसारण कम्पनी (एबीसी)ले अनिश्चित कालका लागि प्रसारणमा रोक लगाएको हो।
उनलाई एबीसीले लगाएको रोकमा राष्ट्रपति ट्रम्पले भने, ‘यो अमेरिकाको लागि राम्रो समाचार हो। किमलसँग कुनै क्षमता थिएन। उनी र उनको टेलिभिजनलाई अनिश्चित कालका लागि बन्द गर्नु राम्रो निर्णय हो। बधाई छ एबीसी । ’
उनले केही टेलिभिजनहरूको रेटिङ निकै कमजोर रहेको र उनीहरूको लाइसेन्स खारेज हुन सक्ने टिप्पणी गरेका हुन्।
किमलले गत हप्ता एक रूढिवादी तर प्रभावशाली व्यक्तित्वको रूपमा रहेका चार्ली किर्कको हत्याको समाचार प्रसारण गरेका थिए। यसमा प्रस्तोताले मारिएका व्यक्ति ट्रम्प निकट रहेको बताएका थिए।
सोही विषयमा एबीसीले टेलिभिजन प्रसारण अनिश्चित कालको लागि बन्द गरेको हो।
ट्रम्पले नियुक्त गरेका फेडेरल कम्युनिकेसन कमिसन(फसीसी)का अध्यक्षले दबाब दिएपछि एबीसीले उक्त निर्णय लिएको हो।
युकेको राजकीय भ्रमणबाट बिहीबार स्वदेश फर्किएपछि ट्रम्पले एयर फोर्स वानमा पत्रकारसँग भने,‘चुनावको बेलामा पनि ९७ प्रतिशत मिडियाहरू मेरो विरुद्धमा रहेका थिए। तर पनि मैले जितेँ।’
उनले यसै सिलसिलामा भने, ‘उनीहरूले मेरो नकारात्मक प्रचारप्रसार मात्रै गरे। उनीहरूले लाइसेन्स पाइरहेका छन्। उनीहरूको लाइसेन्स सायद खोसिनुपर्छ।’
