: ऊर्जा, भौतिक योजना र सहरी विकासमन्त्री कुलमान घिसिङले देश निर्माणको अभियानमा एकजुट भएर अघि बढ्न आह्वान गरेका छन्।
शुक्रबार यातायात व्यवस्था विभाग मिनभवनमा पुगेर श्रमदान अभियानमा सहभागी हुँदै उज्यालो नेपाल अभियानका अभियन्ता समेत रहेका मन्त्री घिसिङले देश–विदेशमा रहेका नेपालीहरू मिलेर जेनजी आन्दोलनका क्रममा जलेर क्षति भएका पूर्वाधारलाई पहिलेको अवस्थामा फर्काउँदै देश निर्माण गर्ने अभियानमा एकजुट हुनुपर्ने बताए।
उनले क्षति भएका पूर्वाधारलाई नेपालको पूर्वाधार हामी आफै बनाउँछौ भन्ने अभियानका साथ देशैभर सञ्चालन गरिने भएकाले त्यसमा सहभागी हुन अनुरोध पनि गरे।
आन्दोलनका क्रममा करिब दुई खर्बभन्दा बढीको क्षति भएको प्रारम्भिक अनुमान रहेको उल्लेख गर्दै मन्त्री घिसिङले नेपालीहरूको श्रमदान र आर्थिक सहयोगमा पुनर्निर्माण गर्न कोष खडा गरिएको बताए।
पुनर्निर्माण विदेशमा रहेका नेपालीहरूको धेरै सहयोग आवश्यक रहेको उनको भनाइ छ।
मन्त्री घिसिङले विदेशमा रहेका नेपालीहरूको मताधिकार, नागरिकता तथा भिसाको समस्यालाई वर्तमान सरकारले समाधान गर्ने प्रतिबद्धता समेत जनाए। त्यस्तै उनले छिटै मन्त्रिपरिषद् विस्तार गर्न प्रधानमन्त्रीले आन्तरिक छलफल गरिरहेको जानकारी दिए।
