: नेकपा एमालेका महासचिव शंकर पोखरेलले नेपाल भूराजनीतिक द्वन्द्वको चपेटामा परेको दाबी गरेका छन्। आज सामाजिक सञ्जालमा लेख्दै पोखरेलले राष्ट्रिय शक्तिलाई कमजोर बनाउने उनीहरूको खेलबाट हामीले आफूलाई जोगाउन नसकेको टिप्पणी गरेका हुन्।
‘हाम्रो देश भूराजनीतिक द्वन्द्वको चपेटामा पर्यो। राष्ट्रिय शक्तिलाई कमजोर बनाउने उनीहरुको खेलबाट हामीले आफूलाई जोगाउन सकेनौं। हाम्रो देश पनि वैध सत्तालाई कमजोर बनाउने डिप स्टेटको प्रयोगशाला बनाइयो।’
सबै समस्याको समाधान लोकतान्त्रिक बाटोबाट खोज्न सकिन्छ भन्ने कुरामा नवयुवाहरुको विश्वास जित्न नसकेको पोखरेलले स्वीकार गरे। उनले नव युवाहरुको विश्वास जितिने बताए। ढिलो चाडो मुलुक लोकतन्त्रको जनसार्वभौम बाटोतिर फर्कने र फर्काइने दाबी गरे। ‘हामीले सबै समस्याको समाधान लोकतान्त्रिक बाटोबाट खोज्न सकिन्छ भन्ने कुरामा नवयुवाहरुको विश्वास जित्न सकेनौं। उनीहरुको भावना र चाहनासँग नेपाली राजनीतिलाई जोड्न सकेनौं। तर यसको अर्थ नेपाललाई बहुलवाद, समावेशीता, लोकतान्त्रिक गणतन्त्र र स्वाधिनता एवम् स्वाभिमानको बाटोबाट पछि धकेल्ने प्रयास सफल हुन्छ भन्ने होइन।’ पोखरेलले भने, ‘ढिलो चाडो मुलुक लोकतन्त्रको जनसार्वभौम बाटोतिर फर्कने छ र फर्काइने छ। नव युवाहरूको विश्वास जितिनेछ।’
महासचिव पोखरेलले नेकपा(एमाले) निर्णायक राष्ट्रिय शक्ति निर्माण गर्दै नेपाली विशेषतामा आधारित समाजवाद निर्माणको दिशामा अघि बढ्न प्रतिबद्ध रहने दाबी गरे।
