: जेनजी आन्दोलनका क्रममा विभिन्न जिल्ला कारागारबाट भागेका ६ कैदीबन्दी स्याङजामा पक्राउ परेका छन्। कारागारबाट फरार उनीहरू लुकिछिपी बसेको भन्ने बिशेष सूचनाका आधारमा प्रहरीले पक्राउ गरेको प्रहरीले जनाएको छ।
पक्राउ पर्नेमा कास्की कारागारबाट भागेका ३ जना, काठमाडौंबाट २ र तनहुँबाट एक जना छन्। पक्राउपछि उनीहरूलाई आवश्यक कारबाहीका लागि स्याङ्जा कारागारमा बुझाइएको छ।
प्रहरी उपरीक्षक दधिराम न्यौपानेका अनुसार कास्की कारागारबाट भागेका यामबहादुर रोका भीरकोट नगरपालिका ३ मा पक्राउ परेका हुन। कर्तव्य ज्यान मुद्दामा कारागार शाखा कास्कीमा रहेका उनी २४ गते फरार भएपछि आफ्नै घरमा आई बसेका थिए।
भीरकोट ५ का २८ वर्षीय बिमल जिटी पनि घरबाटै पक्राउ परे। जिटी जबरजस्ती करणीको मुद्दामा कास्की कारागारमा थिए। कास्कीबाटै भागेका अभिषेक नेपाली पुतलीबजार-१ कालाखोलाबाट पक्राउ परे। पुतलीबजार-९ कोल्माका २६ वर्षीय नेपाली जबरजस्ती करणीको मुद्दामा सजाए भोग्दै थिए।
यसैगरी, केन्द्रीय कारागार जग्गनाथदेव काठमाडौंबाट भागेका चापाकोट नगरपालिका-४ का ३४ वर्षीय विनोद दर्जी बिरुवा गाउँपालिका-६ धरादीबाट पक्राउ परे। दर्जीलाई जबरजस्ती करणीको मुद्दामा दोषी थिए।
पुतलीबजार-५ पौवेगौंडेका ६७ वर्षीया नुनुमाया कार्की पनि घरबाट पक्राउ परिन्। कर्तव्य ज्यान मुद्दाका अभियुक्त हुन्। तनहुँको कारागारबाट फरार यमबहादुर बिक पुतलीबजार नगरपालिका-१४ बाट पक्राउ परे। लागुऔषध दुरुपयोगको मुद्दामा उनी कारागारमा थिए।
