: ‘जेन–जी’ आन्दोलनका कारण जेल फोरेर फरार भएका सिन्धुली कारागारका २ सय ९४ जना कैदीबन्दीहरू जेल फर्किएका छन्। सिन्धुलीका प्रहरी प्रमुख लालध्वज सुवेदीका अनुसार ३७ जना महिला र २ सय ५७ जना पुरुषहरू गरी हालसम्म जम्मा २ सय ९४ जना कैदीबन्दीहरू जेल फर्किएका हुन्।
‘जेन–जी’ आन्दोलनका क्रममा गत भाद्र २५ गते सिन्धुली कारागारबाट ४ सय ७१ जना कैदीबन्दीहरू फरार भएका थिए। उनीहरू मध्ये केही आफै जेल फर्किएका र केहीलाई प्रहरीले नियन्त्रणमा लिएको प्रहरी प्रमुख सुवेदीको भनाइ छ। यस्तै प्रहरीले जेनजी आन्दोलनकै क्रममा देशका विभिन्न कारागारबाट फरार कैदीबन्दीमध्ये १९ जनालाई सिन्धुली प्रहरीले नियन्त्रणमा लिएको छ। उनीहरूलाई सम्बन्धित कारागारमा पठाउने काम भइरहेको बताइएको छ।
यसैबीच सिन्धुली कारागारबाट फरार कैदीबन्दीलाई यही असोज २० गते भित्र सम्पर्कमा आउन आग्रह गरिएको छ। सिन्धुली कारागारले २० गते भित्र कारागार नफर्किए उनीहरूलाई थप कारबाही हुने चेतावनी समेत दिएको छ। गत भाद्र २५ गते फरार मध्ये अझै १ सय ७७ जना कैदीबन्दीहरू सम्पर्कमा आएका छैन। उनीहरूलाई आगामी २० गते भित्र जेल फर्कन आग्रह गरिएको छ।
स्वतः नआए नियन्त्रणमा लिएर थप कारबाही गरिने सिन्धुलीका निमित्त कारागार प्रशासक मात्रिका प्रसाद पहाडीले जानकारी दिए। उक्त मितिसम्म नफर्किए फरार कैदीबन्दीहरूलाई कारागार ऐन २०७९ र अन्य प्रचलित कानुन अनुसार कारबाही हुने बताइएको छ। सूचनामा फरार कैदीबन्दीहरूलाई लुकाउने, छिपाउने वा आश्रय दिएर राख्ने व्यक्तिहरूलाई समेत कसुरदार ठानी प्रचलित कानुन अनुसार कारबाही गरिने उल्लेख गरिएको छ।
