— गाजा पट्टीमा बुधबार भएको इजरायली आक्रमणमा १२ जना प्यालेस्टिनीको मृत्यु हुनुका साथै अन्य घाइते भएको जनाइएको छ ।
प्यालेस्टिनी समाचार एजेन्सी (डब्लुएएफए) ले चिकित्सा स्रोतलाई उद्धृत गर्दै गाजा सहरको दक्षिणपूर्वमा अल–जेइतुनमा विस्थापित व्यक्तिहरूको आश्रयस्थल बनेको अल–फलाह स्कूलमा गरेको हवाई आक्रमणमा छ जनाको मृत्यु भएको तथा अन्य घाइते भएको रिपोर्ट गरेको छ ।
गाजाको उत्तरपूर्वी क्षेत्रमा भएको बम विस्फोटमा एकजना मारिएको र अन्य घाइते भएको स्रोतले बताएको छ । स्रोतले गाजाको दक्षिणपश्चिममा ताल अल–हवामा भएको बम विस्फोटमा दुई जनाको मृत्यु भएको समेत जनाएको छ ।
मध्य गाजा पट्टीको नुसिरात शरणार्थी शिविरमा इजरायलले गरेको गोलाबारीमा दुई प्यालेस्टिनीको मृत्यु हुनुका साथै अन्य छ जना घाइते भएको जनाइएको छ । दक्षिणी गाजा पट्टीको वितरण केन्द्र नजिकै इजरायली गोलाबारीमा एक जना मृत्यु भएको र अन्य घाइते भएको जनाइएको छ ।
गाजाको पश्चिममा रहेको अल–शती शरणार्थी शिविरमा इजरायली ड्रोनले बम प्रहार गर्दा धेरै प्यालेस्टिनीहरू घाइते भएको तथा शिविरमा लगातार एक हप्तादेखि बमबारी हुदाँ दर्जनौँको मृत्यु हुनुको साथै कयौँ घाइते भएको जनाइएको छ ।
केही समय अघि, चिकित्सा स्रोतहरूले गाजामा १९ जनासहित २३ जनाको ज्यान लिएको घोषणा गरेका थिए ।
प्यालेस्टिनी स्वास्थ्य मन्त्रालयको तथ्यांकले सेप्टेम्बर २०२५ मा मात्र गाजा पट्टीमा दुई हजार १०६ जनाको मृत्यु भएको रेकर्ड गरिएको छ ।
