— पाँचदिन अघि राप्ती राजमार्ग अन्तर्गत सल्यानको चोरखोलामा भएको फोर्स गाडी दुर्घटनामा सख्त घाइते भएकी महिलाको मृत्यु भएको छ । सख्त घाइते भएकी ३६ वर्षीया विना केसीको उपचारको क्रममा मृत्यु भएको हो । उनको मृत्यु भएपछि उक्त दुर्घटनामा मृत्यु हुनेको संख्या चार जना पुगेको छ ।
गत असोज १२ गते रुकुम पश्चिमबाट दाङ जाँदै गरेको लु २ ख ६५०२ नम्बरको जिप राप्ती राजमार्ग अन्तर्गत कुपरकोट गाउँपालिका ३- चोरखोला नजिकै दुर्घटना हुँदा रुकुम जिल्लाको बाँफिकोट गाउँपालिका–५ का एकै घरका वर्ष २७ का प्रकाश केसी, शशिधर केसी र वर्ष ६८ की पवी केसीको घटनास्थलमै मृत्यु भएको थियो भने वर्ष ४७ का खगेन्द्र केसी र ३६ वर्षकी बिना केसी सख्त घाइते भएका थिए ।
सख्त घाइते भएकी विनाको भारतको लखनउस्थित अस्पतालमा उपचारका क्रममा मृत्यु भएको जिल्ला प्रहरी कार्यालय सल्यानका प्रहरी निरीक्षक रेशम खत्रीले बताए । लखनउमा मृत्यु भएकी उनको शवलाई आफन्तले पोष्टमार्टमका लागि जिल्ला अस्पताल रुकुम लगेको उनले जानकारी गराए ।
उनका अनुसार वर्ष ६८ की पवी केसी बिरामी भएपछि घर परिवारले उपचार गर्न लैजाँदै गर्दा जिप अनियन्त्रित भएर चोरखोलामा दुर्घटनामा परेको थियो । जिप सडकदेखि २ सय मिटर तल खसेको थियो ।
