— जिल्ला सदरमुकाम मन्थलीमै बहुउद्देश्यीय कभर्डहल वर्षौंदेखि अधुरो छाडिएको छ । मन्थली नगरपालिका–२ स्थित भुत्त्याहा खोला किनारमा निर्माणाधीन कभर्डहल ५ वर्षदेखि अलपत्र छ । २०७७ असारमा निर्माण सुरु गरिएको कभर्डहल १८ महिनाभित्र सम्पन्न गर्ने लक्ष्य थियो ।
बागमती प्रदेश सामाजिक विकास मन्त्रालयको ६ करोड ५७ लाख ९२ हजार ८ सय ८० रुपैयाँमा सुनकोसी–गिरी जेभी, काठमाडौंसँग ठेक्का सम्झौता भएको थियो । ६० प्रतिशतभन्दा बढी संरचना निर्माण भइसके पनि निर्माण व्यवसायीले रिमोटबाट चल्ने १ हजार १८० वटा अटोमेटिक कुर्सी जडान गर्न नसक्दा काम रोकिएकै वर्षौं भइसक्यो ।
स्थानीय खेलाडी रमेश चापागाईं भन्छन्, ‘कभर्डहल बन्न थालेपछि खेलाडीमा उत्साह थपिएको थियो । तर १८ महिनामा बन्नुपर्ने ५ वर्षसम्म बनेको छैन । यसले खेलाडीलाई असुविधा भएको छ ।’ सबै संरचना निर्माण भइसके पनि नेपालमै अहिलेसम्म प्रयोगमा नआएको भनिएको रिमोटबाट चल्ने १ हजार १८० वटा अटोमेटिक कुर्सी जडान गर्न नसक्दा कभर्डहल अलपत्र बनेको मन्थली नगरपालिका–२ का वडाध्यक्ष सुरेन्द्र कार्कीले बताए ।
उनका अनुसार ५ वर्षअघि सुरु भएको कभर्डहल अहिले जीर्ण बन्दै गएको छ । ‘बनेका संरचना फुट्ने र भत्किने अवस्थामा पुगेका छ,’ उनले भने, ‘वडाध्यक्षको काम खेलकुद पूर्वाधार संरक्षण नभई कभर्डहलमा पस्ने पशुचौपाया धपाउने काममा सीमित भएको छ ।’
सार्वजनिक निर्माण तथा कार्यान्वयन इकाई काभ्रे र ठेक्का पाएको निर्माण कम्पनी सुनकोशी–गिरी जेभी काठमाडौंबीच लगातार आरोप–प्रत्यारोपका कारण राज्यको करोडौं रुपैयाँको लगानी अलपत्र बनेको अध्यक्ष कार्कीको भनाइ छ । सामाजिक विकास कार्यालय काभ्रेकी प्रमुख रनमाया फ्याकका अनुसार मन्थलीस्थित बहुउद्देश्यीय कभर्डहल सामाजिक विकास मन्त्रालयको ६ करोड ५७ लाख ९२ हजार ८८० मध्ये अन्य संरचनाबाहेक करिब २ करोड ८५ लाख रुपैयाँ अटोमेटिक कुर्सी जडानका लागि स्टमेट गरिएको थियो ।
तर, सोही काम जम्मा ८५ लाख रुपैयाँमा गर्ने गरी सुनकोशी–गिरी जेभीले ठेक्का पाएको र काम पूरा गर्न नसक्दा योजना अलपत्र बनेको उनले बताइन् । उनले भनिन्, ‘२ करोड ८५ लाखको स्टमेट रहेको अटोमेटिक कुर्सी जडान गर्ने काम ८५ लाखमा ठेक्का पाएको हो । अहिले यही काम नसकेर योजना रोकिएको अवस्था छ । निर्माण व्यवसायीले काम गर्छु भन्ने प्रतिबद्धता जनाएका छन् । अरू कुनै विकल्प छैन, तोकिएको बजेटमै काम गर्नुपर्छ ।’
उनका अनुसार प्रदेशको युवा तथा खेलकुद मन्त्रालयबाट सचिवस्तरीय निर्णयमार्फत २०८३ जेठसम्म काम सक्ने गरी म्याद थपिएको छ । म्याद थपिएको पछिल्लो चरणमा कार्यालयका इन्जिनियर र निर्माण व्यवसायीबीच अटोमेटिक चियर जडानबारे छलफल भएको र त्यसपछि निर्माण व्यवसायीले काम अघि बढाइसकेको जानकारी दिएको प्रमुख फ्याकको भनाइ छ ।
सामाजिक विकासमन्त्री कञ्चनचन्द्र बादेले मन्थलीको बहुउद्देश्यीय कभर्डहल योजना सम्पन्न गर्न देखिएका कानुनीलगायत समस्या समाधान गरी दसैं सकिएलगत्तै बाँकी काम सुरु गर्ने तयारी भइरहेको बताए । उनले भने, ‘यो अहिले क्रोनिक प्रोजेक्ट बनेको छ । मन्त्रालयमै चर्चाको विषय बनेपछि स्वयं अनुगमनमा आए । कानुनी जटिलता, निर्माण व्यवसायी र कार्यालयबीचको समन्वय, स्थानीय सरकारका धारणा सबै सुनेका छौं । अब देखिएका समस्या समाधान गरेर दसैं सकिएपछि बाँकी काम सुरु हुन्छ ।’
