— भारतिय सामाजिक अभियन्ता सोनाम वाङ्चुकले २४ सेप्टेम्बरमा लद्दाखमा भएको घटना स्वतन्त्र र न्यायिक छानबिन हुनुपर्ने बताएका छन् । जोधपुर केन्द्रीय कारागारमा रहेका उनले गत सेप्टेम्बर २४ तारिखको घटना छानबिन नभएसम्म आफू जेलमै बस्न तयार रहेको बताएका हुन् ।
वाङ्चुकका वकिल मुस्तफा हाजी र उनका दाइ का त्सेतान दोर्जे लेले गत शुक्रबार जोधपुर केन्द्रीय जेलमा उनलाई भेटेका थिए । आइतबार उनीहरूले वाङ्चुकको सन्देश सामाजिक सञ्जालमार्फत सार्वजनिक गरे ।
वाङ्चुकले सन्देशमा भनेका छन्, 'म शारीरिक र मानसिक रूपमा ठिक छु, सबैको चिन्ता र शुभकामनाका लागि धन्यवाद दिन चाहन्छु,' उनी भन्छन्, 'ज्यान गुमाउनेहरूप्रति मेरो गहिरो श्रद्धाञ्जली छ र घाइते तथा पक्राउ परेकाहरूको लागि मेरो प्रार्थना सधैं रहनेछ ।'
भारतको लद्दाखमा गत २४ सेप्टेम्बरमा भएको हिंसात्मक आन्दोलनका कारण उनी २६ सेप्टेम्बरमा पक्राउ परेका हुन् । आन्दोलनका क्रममा ४ जना मारिएका थिए भने १५० भन्दा बडी घाइते भएका छन् ।
२४ सेप्टेम्बरयता सुरु भएको तनाव मत्थर भएजस्तो देखिए पनि यो क्षेत्र पूरै शान्त भइसकेको छैन । शनिबार स्थानीय प्रशासनले लेहमा जारी कर्फ्यु हटाइएको र स्थिति सामान्य भएको बताए पनि त्यहाँ अवस्था अझै अवस्था सामान्य भएको छैन ।
आन्दोलनको १० दिन बितिसक्दा पनि त्यहाँ मोबाइल र इन्टरनेट सेवामा लगाइएको प्रतिबन्ध हटेको छैन । कर्फ्यु हटाइएपनि ५ जना वा त्यसभन्दा धेरै भेला हुन नपाउने आदेश अझै जारी छ । यद्यपि सरकार वार्ताका लागि तयार रहेको भारतीय सञ्चारमाध्यमले जनाएको छ ।
शान्ति सम्झौताका लागि भूमिसम्बन्धी सुरक्षा, रोजगारी, र लद्दाखको जनसांख्यिक पहिचान जोगाउने जस्ता विषयहरू समेटिएको भारतीय सञ्चारमाध्यम एनडीटिभीले जनाएको छ ।
लद्दाखका प्रमुख सचिव पवन कोटवालले वक्तव्य पढ्दै, गत सेप्टेम्बर २४ मा पक्राउ परेका ४० जना युवाको रिहाइ घोषणा गरेका छन् ।
