— शरीरको प्रतिरोध प्रणालीबारे अनुसन्धान गर्ने ३ वैज्ञानिकलाई यस वर्षको चिकित्सा विज्ञानतर्फको नोबेल पुरस्कार दिइएको छ । नोबेल पुरस्कार कमिटीले सोमबार स्वीडेनको स्टकहोल्ममा आयोजित एक कार्यक्रममा प्रतिष्ठित पुरस्कार घोषणा गरेको हो ।
शरीरको प्रतिरोध प्रणालीमा 'रेग्युलेटरी टी-सेल' नामक विशेष कोषहरू रक्षकका रूपमा उपस्थित हुन्छन् भन्ने तथ्य पत्ता लगाएका म्यारी ई. ब्रन्को, फ्रेड राम्सडेल र सिमोन साकागुचीलाई चिकित्सातर्फको नोबेल पुरस्कार दिने निर्णय गरिएको हो ।
यस वर्षको चिकित्सा नोबेल पुरस्कार विजेताहरूले प्रतिरक्षा प्रणाली (इम्युन सिस्टम) कसरी नियन्त्रणमा राखिन्छ भन्ने कुरा पत्ता लगाएका छन् । शरीरको शक्तिशाली प्रतिरक्षा प्रणालीलाई नियन्त्रणमा राख्न आवश्यक छ, नत्र यसले हाम्रो आफ्नै अंगहरूमा आक्रमण गर्न सक्छ ।
ब्रन्को, राम्सडेल र साकागुचीले 'पेरिफेरल इम्युन टोलरन्स' सम्बन्धी आफ्नो नवीन खोजका लागि यस वर्षको नोबेल पुरस्कार पाएका हुन् । वैज्ञानिकहरूको नयाँ खोजले क्यान्सर तथा 'अटोइम्युन' रोगहरूको उपचारमा थप टेवा पुग्ने नोबेल कमिटीले जनाएको छ । यसले अंग प्रत्यारोपण (ट्रान्सप्लान्टेसन)लाई अझ सफल बनाउन पनि मद्दत पुर्याउन सक्ने वैज्ञानिकहरूले जनाएका छन् । यीमध्ये केही उपचारहरू अहिले नै क्लिनिकल ट्रायलमा छन्।
नोबेल विजेताले नोबेल डिप्लोमा, नोबेल पदक र १ करोड १० लाख स्वीडिस क्रोनर (१० लाख अमेरिकी डलर) पाउँछन् । एकभन्दा बढी विजेता भएमा पुरस्कार रकम बाँडिन्छ । यस वर्ष अक्टोबर ७ मा भौतिकशास्त्र, अक्टोबर ८ मा रसायनशास्त्र, अक्टोबर ९ मा साहित्य, अक्टोबर १० मा शान्ति र अक्टोबर १३ मा अर्थशास्त्रतर्फको पुरस्कार विजेताको नाम घोषणा गर्ने नोबेल कमिटीले जनाएको छ ।
