: एसियाली फुटबल महासंघ (एएफसी) एसियन कप छनोटअन्तर्गत भियतनामसँग खेल्न जाने नेपाली राष्ट्रिय फुटबल टोलीको बिदाइ गरिएको छ। अखिल नेपाल फुटबल संघ (एन्फा) ले सोमबार सातदोबाटोस्थित एन्फा कम्प्लेक्समा नेपाली टोलीको बिदाइ गरेको हो। नेपाली टोलीलाई राष्ट्रिय खेलकुद परिषद् (राखेप) का सदस्यसचिव टंकलाल घिसिङ, एन्फा कार्यवाहक महासचिव बद्री भट्टराईलगायतले बिदाइ गरेका थिए।
बिदाइ कार्यक्रममा बोल्दै राखेप सदस्यसचिव घिसिङले नेपालीको विभाजित मनलाई एकताबद्ध गर्ने माध्यम नै खेलकुद भएकाले त्यही अनुरुप प्रदर्शन गर्न खेलाडीलाई शुभकामना दिएका थिए। कार्यवाहक महासचिव भट्टराईले जेनजी आन्दोलन र बाढी पहिरोका कारण देश अहिले अप्ठयारो अवस्थामा रहेकाले फुटबलमार्फत सम्पूर्ण नेपालीको मुहारमा खुसी ल्याउन आग्रह गरेका थिए।
नेपालले बिहीबार भियतनामसँग उसैको मैदानमा एएफसी एसियन कप छनोटको खेल खेल्दैछ। बिनदुंग रंगशालामा हुने यो नेपालको अवे खेल हो। यस्तै अक्टोबर १४ मा नेपालले घरेलु मैदानमा खेल्नुपर्ने खेल पनि भियतनाममै खेल्नेछ। घरेलु मैदान दशरथ रंगशालालाई एएफसीले अयोग्य गरेपछि दुवै खेल भियतनाममै हुन लागेको हो।
एएफसी एसियन कप छनोटका लागि नेपालका मुख्य प्रशिक्षक म्याट रसले आइतबार किरणकुमार लिम्बूको कप्तानीमा २३ सदस्यीय टोली घोषणा गरेका थिए। प्रशिक्षक रसले गत सेप्टेम्बर २३ मा ३३ खेलाडीलाई बन्द प्रशिक्षणमा बोलाएका थिए। १२ दिनको प्रशिक्षणपछि १० खेलाडीलाई बाहिर राख्दै उनले राष्ट्रिय टोली घोषणा गरेका हुन्। गत सेप्टेम्बर ६ मा नेपालले बंगलादेशसँग अन्तर्राष्ट्रिय मैत्रीपूर्ण खेल खेलेको थियो। त्यस टोलीमा रहेका ६ खेलाडी बाहिरिएका छन्। बंगलादेशसँगको खेलका लागि टोलीमा रहेका अमित लामा, आदित्य शाक्य, रन्दीप पौडेल, समीर तामाङ, सृजनराज गौतम र टिकेन्द्र थापा टोलीमा अटाउन सकेनन्। रन्दीप र सृजनराज भने प्रारम्भिक छनोटमै परेका थिएनन्।
बंगलादेशसँगको मैत्रीपूर्ण खेलमा टोलीमा अटाउन नसकेका आयुष घलान, सुमित श्रेष्ठ र कृतिशरत्न छुन्जु भने फर्किएका छन्। यस्तै गोलरक्षक विशाल सुनार, डिफेन्डर विमल पाण्डे र सनिश श्रेष्ठले पनि पुनरागमन गरेका छन्।
किरणकुमार लिम्बूको कप्तानीमा रहेको नेपाली टोलीमा अभिषेक लिम्बू, अनन्त तमाङ, अञ्जन विष्ट, एरिक विष्ट, आयुष घलान, विमल पाण्डे, विशाल सुनार, दीप कार्की, दिनेश हेन्जन, जिलेस्पीजङ कार्की, कृतिकरत्न छुन्जु, कुशल देउवा, लाकेन लिम्बू, मणिकुमार लामा, मनिष डाँगी, रोहित चन्द, रोहन कार्की, सनिश श्रेष्ठ, सुवास ठकुरी बम, सुमित श्रेष्ठ, सुमन श्रेष्ठ र योगेश गुरुङ छन्।
