: ६० करोड ठगीको आरोप लागेकी बलिउड अभिनेत्री शिल्पा शेट्टीसँग घन्टौं बयान लिइएको छ। मुम्बई प्रहरीको आर्थिक अपराध शाखाले शिल्पासँग करिब पाँच घण्टा बयान लिएको भारतीय मिडियाले समाचार प्रकाशित गरेका छन्। बयान उनकै घरमा लिएको प्रहरीले जनाएको छ। शिल्पाका पति तथा व्यवसायी राज कुन्द्रलाई पनि सोही मुद्दामा आरोपित बनाइएको छ। उनको पनि दुईपटक बयान लिइसकेको छ।
अनुसन्धानका क्रममा जालसाजी गरिएको रकमको एक भाग शिल्पाको बैंक खातामा जम्मा भएको खुलेपछि प्रहरीले उनको बयान लिएको हो।
मुम्बईका दीपक कोठारी नामका व्यापारीले शिल्पा र उनका पतिविरुद्ध रकम ठगीको आरोप लगाएका छन्।
व्यापारी कोठारीका अनुसार सन् २०१५ देखि २०२३ को बीचमा उनले आफ्नो व्यापार बढाउनका लागि शिल्पा र राजको दम्पत्तीलाई ६०.४८ करोड भारु दिएका थिए। तर, उक्त रकम उनीहरूले आफ्नो निजी खर्चमा प्रयोग गरेको ती व्यापारीको आरोप छ।
कोठारीका अनुसार सुरूमा १२ प्रतिशत ब्याजदरमा ७५ करोड रुपैयाँ ऋण दिएका थिए। तर, करबाट बच्नको लागि लगानीको रूपमा देखाइएको थियो। उनीहरूले अप्रिल २०१५ मा ३१.९५ करोड रुपैयाँ र सेप्टेम्बर २०१५ मा २८.५३ करोड रुपैयाँ लिए। जुन ब्याजसहित फिर्ता हुनुपर्ने हो, भएन।
शिल्पाले सेप्टेम्बर २०१६ मा कम्पनीको निर्देशक पदबाट राजीनामा दिएकी ती व्यापारीको भनाइ छ। रकम लिएर पनि शिल्पा र उनका पतिले वाचा पूरा नगरेको आरोप छ।
