: भारतका प्रधानमन्त्री नरेन्द्र मोदीले प्रधानन्यायाधीश बीआर गवईमाथि जुत्ता प्रहार भएको घटनाको निन्दा गरेका छन्। उनले घटनाबारे आफूले प्रधानन्यायाधीश गवईसँग कुरा गरेको र उक्त आक्रमणबाट प्रत्येक भारतीय आक्रोशित रहेको बताएका छन्।
'मैले भारतका प्रधानन्यायाधीश बीआर गवईजीसँग कुरा गरेँ। सर्वोच्च अदालत परिसरमा उहाँमाथि भएको आक्रमणबाट प्रत्येक भारतीय आक्रोशित छन्। हाम्रो समाजमा यस्ता निन्दनीय कार्यहरूको लागि कुनै ठाउँ छैन। यो पूर्णतया निन्दनीय छ,' उनले इन्स्टाग्राममा लेखेका छन्।
सोमबार दिउँसो इजलास चलिरहेको बेला एकजना कानुन व्यवसायीले आफ्नो जुत्ता फुकालेर प्रधानन्यायाधीशमाथि प्रहार गरेका थिए। घटनालगत्तै प्रहरीले उनलाई तुरून्तै बाहिर निकालेको थियो। प्रधानन्यायाधीशमाथि आक्रमण गर्ने राकेश किशोर नामका कानुन व्यवसायीलाई बार काउन्सिल अफ इण्डियाले निलम्बन गरेको छ।
घटनापछि प्रधानन्यायाधीश गवईले यो विषयमा बेवास्ता गर्न र बहस जारी राख्न कानुन व्यवसायीलाई आग्रह गरेका थिए। उनले भनेका थिए,' यी सबैबाट विचलित नहुनुहोस्। हामी विचलित छैनौं। यी कुराहरूले मलाई असर गर्दैन।'
मध्य प्रदेशको खजुराहो मन्दिर परिसरमा रहेको भगवान् विष्णुको मूर्तिको जीर्णोद्वारको माग गर्दै दायर भएको रिटमा सुनुवाइका क्रममा प्रधानन्यायाधीश गवाईको भनाइमा कानुन व्यवसायी किशोर असन्तुष्ट रहेको प्रारम्भिक अनुसन्धानबाट खुलेको छ।
प्रधानन्यायाधीश गवाईले सेम्टेम्बर १६ मा युनेस्को विश्व सम्पदा खजुराहो मन्दिर परिसरको एक भाग जावरी मन्दिरमा रहेको ७ फिट अग्लो भगवान विष्णुको मूर्तिको पुनर्निमार्ण र पुनर्स्थापना गर्न माग गर्दै दायर गरेको निवेदन खारेज गरिदिएका थिए। सोही विषयलाई लिएर कानुन व्यवसायी किशोरले प्रधानन्यायाधीशमाथि आक्रोश पोखेको हुनसक्ने अनुमान गरिएको छ
