: फ्रान्सका प्रधानमन्त्री सेबास्टियन लेकोर्नुले सोमबार राजीनामा दिएका छन्। प्रधानमन्त्रीको पदभार सम्हालेको एक महिना नपुग्दै उनले राजीनामा दिएका हुन्। लेकोर्नु पछिल्लो दुई वर्षमा पाँचौं फ्रान्सेली प्रधानमन्त्री हुन्।
नयाँ मन्त्रिपरिषद् घोषणा भएको केही घण्टापछि नै उनको राजीनामा आएको हो। लेकोर्नुले सोमबार बिहान राष्ट्रपति इमानुएल म्याक्रोनसँग लगभग एक घण्टा भेटघाट गरेका थिए। त्यसको केही समयपछि राष्ट्रपति कार्यालयले उनको राजीनामाको घोषणा गरेको थियो।
फ्रान्कोइस बायरोको सरकारको पतन पछि लेकोर्नुले २६ दिनअघि फ्रान्सको प्रधानमन्त्रीको पदभार ग्रहण गरेका थिए। नयाँ मन्त्रिपरिषद्मा उनले बायरो सरकारका अधिकांश मन्त्रीहरूलाई कायम राखे र केही पदहरूमा नयाँ नियुक्तिहरू गरेका थिए। यसको सबै दलहरूले व्यापक आलोचना गरेका थिए।
लेकोर्नुको राजीनामापछि धेरै दलहरूले अब समयपूर्व चुनावको लागि आह्वान गरिरहेका छन्। केहीले राष्ट्रपति म्याक्रोनको राजीनामाको माग गरेका छन्।
यद्यपि, म्याक्रोले २०२७ मा आफ्नो कार्यकाल समाप्त हुनुभन्दा अघि राष्ट्रपति पद नछोड्ने स्पष्ट पारेका छन्। 'संसद भंग गर्नुहोस् वा राजीनामा दिनुहोस् - म्याक्रोनले दुई मध्ये एक रोज्नुपर्नेछ,' नेशनल र्याली पार्टीका वरिष्ठ नेता सेबास्टियन चेनुले भने।
