— कप्तान इन्दु बर्मा र पूर्वकप्तान रुबिना क्षेत्रीले अनुभवी इनिङ्स खेलेपछि नेपाली महिला क्रिकेट टोलीले मंगलबार चौथो ट्वान्टी–२० अन्तर्राष्ट्रिय क्रिकेटमा मलेसियालाई ६ विकेटले पराजित गरेको छ । यससँगै नेपालले पाँच खेलको ट्वान्टी–२० अन्तर्राष्ट्रिय शृंखला २–२ को बराबरीमा ल्याएको छ ।
पहिला ब्याटिङ गरेको मलेसियाले क्वालालम्पुरस्थित वायुमास ओभलमा निर्धारित २० ओभरमा ५ विकेट गुमाई १ सय ११ रन बनाएको थियो । इन्दु र रुबिनाको इनिङ्सपछि नेपालले १७.३ ओभरमा १ सय १५ रन बनाउँदै खेल जितेको हो । स्कोर बराबरी भएको अवस्थामा इन्दुले विजयी चौका प्रहार गरिन् ।
इन्दु ३९ बलमा ४८ र रुबिना २३ बलमा २३ रन बनाई अविजित रहे । यी दुईले पाँचौं विकेटका लागि ५५ बल खेल्दै ६१ रनको अविजित साझेदारी गरे । इन्दुले ६ चौका र रुबिनाले २ चौका र १ छक्का प्रहार गरेका थिए । कविता कुँवरले २६ बलमा १६ रन बनाइन् । रुवि पोदार ५, सम्झना खड्का ११ र पूजा महतो ७ रनमा आउट भए । पूजालाई एइना हमिजाह हासिमले सिधा थ्रोमा रनआउट गरिन् ।
यसअघि नेपालले मलेसियाका दुवै ओपनर हासिम र वान जुलियालाई व्यक्तिगत खाता खोल्नुअघि नै आउट गरेको थियो । नेपालविरुद्धको यस शृंखलाको पछिल्लो तीनमध्ये दुई खेलमा अर्धशतक बनाइसकेकी हासिमलाई कविता कुँवरले कट एन्ड बोल्ड गरिन् । जुलिया भने पूजाको बलमा बोल्ड भइन् । कप्तान विनिफ्रेड दुराइसिंघमलाई कविता कुँवरले नै २ रनमा आउट गरिन् ।
मास इलिसाले ६३ बलमा अविजित ५६ रन बनाइन् भने माहिराहले २१ बलमा १८ र नुर डानियाले १५ बलमा २ चौकासहित १५ रन बनाए । नेपालबाट प्लेयर अफ द म्याच कविताले ४ ओभरमा १० रन खर्चेर ३ विकेट लिइन् । पूजा र कविता जोशीले १–१ विकेट लिएका थिए । पूजाले आफ्नो एकमात्र ओभरमा १२ रन खर्चेकी थिइन् । कविता जोशीले ३ ओभरमा १८ रन खर्चिइन् । निर्णायक पाँचौं तथा अन्तिम खेल बुधबार हुनेछ ।
