। विश्वकै सबैभन्दा चर्चित तथा धनी युट्युबर मिस्टर बिस्ट अर्थात् जिमी डोनाल्डसनले आर्टिफिसियल इन्टेलिजेन्सको विषयमा गम्भीर चिन्ता व्यक्त गरेका छन् ।
उनका अनुसार यदि एआई टूलहरुले मानिसले जत्तिकै वा त्यो भन्दापनि उत्कृष्ट गुणस्तरको भिडियो बनाउन थालेमा आगामी दिनमा यो युट्युब क्रियटरहरुको भविष्यका लागि ठूलो खतरा बन्न सक्दछ ।
मिस्टर बिस्टले सोसल मिडिया प्लाटफर्म एक्समा लेखेका छन्ः एआईबाट तयार पारिएका र वास्तविक भिडियोको बीचमा फरक छुट्टाउन कठीन बनिसकेको छ । यसले कन्टेन्ट क्रियटरहरु र उनीहरुको आम्दानी दुबैको लागि विनाशकारी स्थिति पैदा गर्न सक्दछ ।
ओपन एआईले आफ्नो अत्याधुनिक भिडियो जेनेरेसन टूल क्यचब द्द लञ्च गरेसँगै युट्युबर मिस्टर बिस्टको यस्तो अभिव्यक्ति सार्वजनिक भएको हो ।
सोरा टू अहिले आइओएस प्रयोगकर्ताका लागि पनि उपलब्ध भएको छ । यो टूलको सहयोगमा प्रयोगकर्ताहरुले शव्दहरु मात्र लेखेर त्यसबाट निकै वास्तविक जस्तो देखिने भिडियोहरु बनाउन सक्दछन्।
उता फेसबुकको मातृ कम्पनी मेटाले पनि आफ्नो प्लाटफर्ममा AI-Only Feed सुरु गरेको छ, जसमा केवल एआईबाट बनाईएका पोस्ट तथा भिडियोहरु देखाइनेछ ।
विज्ञहरुका अनुसार यस प्रकारका प्रविधिहरुले युट्युब सामाग्री, कपिराइट सम्बन्धी अधिकार तथा सिर्जनात्मक पेशाहरुलाई गहन रुपमा प्रभावित गर्न सक्दछ ।
रोचक त के भने मिस्टर बिस्ट स्वयंले यसअघि एआईको प्रयोग गरिसकेका छन् । उनले आफ्नो प्लाटफर्म ViewStats मा एआई थम्बनेल जेनेरेटर लन्च गरेका थिए । यसबाट क्रियटरहरुले केही सेकेण्डमै आकर्षक थम्बनेल बनाउन सक्दथे ।
तर उक्त एआई टूलका विषयमा विवाद भयो । कतिपय मानिसहरुले उक्त टूलका कारण ग्राफिक डिजाइनरहरुको जागिरमा खतरा बढ्ने चिन्ता व्यक्त गरे । बढ्दो विरोध तथा प्रयोगकर्ताहरुको प्रतिक्रियाहरुपछि मिस्टर बिस्टले उक्त टूल बन्द गर्ने निर्णय गरेका थिए ।
मिस्टर बिस्टका अनुसार एआई एक उपयोगी टूल हो । तर यसले मानवीय सिर्जनशीलता तथा वास्तविक कलाकारको स्थान लिन सक्दैन ।
यदि यस प्रविधिमा नियन्त्रण कायम गर्न नसकिएमा युट्युब क्रियटरहरुको अस्तित्व र उनीहरुको आम्दानी दुबै खतरामा पर्नसक्ने उनको चिन्ता छ । एजेन्सीको सहयोगमा
