। छिमेकी मुलुक भारतको मध्य प्रदेशमा कफ सिरप सेवनबाट कम्तीमा पनि २० जना बालबालिकाको मृत्यु भएपछि कफ सिरफ उत्पादन गर्ने एक कम्पनीका मालिकलाई प्रहरीले पक्राउ गरेको छ ।
मध्य प्रदेश प्रहरीले चेन्नईस्थित स्रेसन फार्माका मालिक एस रंगनाथनलाई पक्राउ गरेको भारतीय सञ्चारमाध्यमहरूले जनाएका छन् । यो कम्पनी कोल्ड्रिफ नामक दूषित खोकीको सिरप उत्पादन गरेको मध्य प्रदेश प्रहरीको आरोप छ । यो सिरपको सेवनबाट मध्ये प्रदेशमा कम्तीमा २० जना बालबालिकाको मृत्यु भएको प्रहरीले जनाएको छ ।
छिन्दवाडाबाट गएको एसआईटीको टोलीले स्रेसन फार्माका मालिक एस रंगनाथनलाई पक्राउ गरेको छिन्दवाडाका प्रहरी अधिकारी अजय पाण्डेले पुष्टि गरे ।
छिन्दवाडामा कफ सिरप सेवन गरेपछि मृत्यु भएका र त्यसपछि मिर्गौला फेल भएका बालबालिकाको घटनामा अक्टोबर ५ मा १२ सदस्यीय विशेष अनुसन्धान टोली गठन गरिएको थियो।
सेप्टेम्बर ७ देखि परासियामा धेरै बालबालिकाको एकपछि अर्को मृत्यु भइरहेको छ । यसपछि २३ सेप्टेम्बरमा अधिकारीहरूले मृत्युको अनुसन्धान सुरु गरेका हुन् ।
खोकीको सिरप खाएपछि बालबालिकाहरूको मिर्गौला फेल भएर मृत्यु भइरहेको अनुसन्धानबाट खुलेको थियो ।
यो सिरप तमिलनाडुको कांचीपुरम जिल्लामा रहेको स्रेसन फार्मास्युटिकल्स कम्पनीले उत्पादन गरेको थियो । यो सिरप छिन्दवाडा र वरपरका शहरहरूमा बिक्रीको लागि उपलब्ध थियो ।
तमिलनाडु औषधि नियन्त्रण विभागको एक प्रतिवेदनले यस कम्पनीको सिरपको एक ब्याचमा ४८.६ प्रतिशत डाइथिलिन ग्लाइकोल रहेको पत्ता लगाएको छ । जुन ‘विषाक्त’ रसायन हो जसले पहिले गाम्बिया, उज्बेकिस्तान र भारतमा बाल मृत्यु निम्त्याएको छ।
यो रिपोर्ट पछि, मध्य प्रदेश औषधि नियन्त्रण विभागले ४ अक्टोबरमा खोकीको सिरपमा प्रतिबन्ध लगाएको थियो ।
यसका साथै, प्रहरीले चिकित्सक प्रवीण सोनी, कफ सिरप उत्पादन गर्ने कम्पनी स्रेसन फार्मास्युटिकल्सका सञ्चालक र अन्य विरुद्ध पनि एफआईआर दर्ता गरेको थियो ।
-बीबीसीको सहयोगमा
