। बिहीबार माइतीघरबाट पक्राउ परेका निकोलस भुसाल भनिने कमल भुसाललाई सुधार गृह लैजाने भन्दै उनका सहोदर दाजु सागर भुसालले जिम्मा लिएको खुलेको छ ।
२३ असोज (बिहीबार) मा माइतीघरमा प्रदर्शन गर्न पुगेका उनलाई प्रहरीले पक्राउ गरेको थियो । जिल्ला प्रशासन कार्यालय काठमाडौंको अनुमति बेगर माइतीघरमा प्रदर्शन गर्ने भन्दै उनीसहितका व्यक्तिहरू बिहीबार उत्रिएका थिए । त्यसपछि प्रहरीले उनीहरूलाई पक्राउ गरेको थियो ।
पक्राउ लगत्तै जिल्ला प्रहरी परिसर भद्रकालीको हिरासतमा राखिएका उनीहरूको प्रहरीले मेडिकल चेकजाँच गराएको थियो । तीमध्ये निकोलसले गाँजा खाएको जस्तो हाउभाउ देखाएको र बोलेको पाइएपछि प्रहरीले उनको स्वास्थ्य जाँच गरेको थियो ।
उनको ल्याब परीक्षणको स्याम्पल नम्बर ८२०६ एल ५६२९ हो । उनको दिउँसो साढे ४ बजे पिसाब संकलन गरी ७ प्रकारका परीक्षण गरिएको थियो ।
जसमध्ये Tetrahydrocannabinol (THC) परीक्षण पोजेटिभ देखिएको थियो । यो गाँजामा पाइने मुख्य कम्पाउन्ड हो । यसबाट गाँजा खाए/नखाएको मेडिकल रिपोर्टमा थाहा हुन्छ ।
अन्य मोर्फिन, कोकिन, एम फेटामाइन, मेथाडोन लगायतको रिपोर्ट भने नेगेटिभ देखिन्छ ।
सो क्रममा उनले गाँजा खाएको मेडिकल जाँचबाट पुष्टि भयो । गाँजा सेवन गर्ने व्यक्तिलाई सुधार गृहमा राख्ने सहमतिमा मात्रै परिवार तथा आफन्तको जिम्मा लगाउने चलन छ । सोही अनुसार उनलाई आफन्तको जिम्मा लगाइएको परिसरका प्रवक्ता तथा एसपी पवनकुमार भट्टराईले बताए ।
आफन्तको जिम्मा लगाउनुअघि निकोलसलाई सुधार केन्द्र नै लाने सहमति भएको थियो । उनका दाइ सागर (९८४९१५….) ले निकोलसलाई जिम्मा लिएका थिए ।
गाँजा सेवन गरेको पुष्टि भएपछि सहोदर दाजु सागरले ‘सुधार गृह लैजाने गरी बुझी लिएँ’ भन्ने उल्लेख गरेर हस्ताक्षर गरेका छन् ।
प्रहरी परिसरबाट हस्ताक्षरसहित सहमति गरेर बाहिरिएका निकोलस सुधार गृह भने गएनन् । बरु, बाहिर निस्कनासाथ केही पत्रकारसँग स्पष्टीकरण दिन थाले भने केहीबेरमा आफ्नै फेसबुक पेजबाट लाइभ गरे ।
उनले आफूविरुद्ध यसअघि पनि षडयन्त्र हुने गरेको र अहिले पनि त्यही भएको दाबी गरेका छन् ।
तर, अनलाइनखबरले पाएको उनको मेडिकल रिपोर्ट र प्रहरीले जिम्मा लगाउन गराएको कागज अनुसार, उनलाई सुधार गृह नै पठाइएको पुष्टि हुन्छ ।
उनले प्रधानमन्त्री र गृहमन्त्रीविरुद्ध पनि अभिव्यक्ति दिएका थिए ।
