: २०२५ को लागि नोबेल शान्ति पुरस्कार भेनेजुएलाकी राजनीतिज्ञ मारिया कोरिना मचाडोलाई प्रदान गरिएको छ।
नोबेल समितिले भेनेजुएलाका जनताका लागि लोकतान्त्रिक अधिकारको प्रवर्द्धन गर्न, तानाशाहीको सामना गर्दै न्यायपूर्ण र शान्तिपूर्ण तरिकाले लोकतन्त्रका लागि लडेकोमा मारियालाई नोबेल शान्ति पुरस्कार प्रदान गरिएको जनाएको हो।
अमेरिकी राष्ट्रपति डोनाल्ड ट्रम्पले पनि नोबेल शान्ति पुरस्कारमा दाबी गर्दै आएका थिए। ट्रम्पले आफूले विश्वभरका सैन्य द्वन्द्वलाई शान्त पार्न मद्दत गरेको भन्दै यो पुरस्कारमा दाबी गर्दै आएका थिए। उनले हालै गाजामा हमास र इजरायलबीच पहिलो चरणको युद्धविरामको घोषणा गरेका छन्।
यसैबीच मारिया कोरिना मचाडोले सामाजिक सञ्जाल एक्समा एक पोस्ट गर्दै भेनेजुएलाका जनता र अमेरिकी राष्ट्रपति डोनाल्ड ट्रम्पलाई पुरस्कार समर्पित गरेकी छन्।
ʻसबै भेनेजुएलालीहरूको संघर्षको यो मान्यताले हामीलाई स्वतन्त्रता प्राप्त गर्ने हाम्रो कार्य पूरा गर्न प्रोत्साहित गर्नेछ,ʼ उनले लेखेकी छन्।
उनले थप भनिन्,ʻआज पहिलेभन्दा बढी हामी विजयको संघारमा छौं। हामी राष्ट्रपति ट्रम्प, अमेरिकाका जनता, ल्याटिन अमेरिकाका जनता र विश्वका प्रजातान्त्रिक राष्ट्रहरूलाई स्वतन्त्रता र लोकतन्त्र प्राप्त गर्न हाम्रा प्रमुख सहयोगीहरूको रूपमा भरोसा गर्छौं।ʼ
यसका साथै मारियाले लेखेकी छिन्, ʻम यो पुरस्कार भेनेजुएलाका उत्पीडित जनता र हाम्रो उद्देश्यको निर्णायक समर्थनको लागि राष्ट्रपति ट्रम्पलाई समर्पित गर्छु।ʼ
