: नेपाली कांग्रेसका पदाधिकारी तथा पूर्वपदाधिकारीहरूको बैठक आज पनि बस्दैछ। बिहीबारदेखि पार्टी कार्यालय सानेपामा जारी बैठकमा नेताहरु बोल्नेक्रम बाँकी रहेकाले आज पनि बिहान ११ बजे बस्नेगरी बैठक बोलाइएको प्रवक्ता डा.प्रकाशशरण महतले जानकारी दिए।
बैठकमा पार्टीको महाधिवेशन निर्धारित समयमा गर्ने कि विशेष महाधिवेशन गर्ने भन्नेबारे नेताहरूबीच मतभेद रहेको उनको भनाई छ। कांग्रेसले निर्वाचनसँगै संसद् पुनर्स्थापनाको विकल्प खुला राखेर जाने भएको छ। शुक्रबार बसेको पदाधिकारी तथा पूर्वपदाधिकारीको बैठकपछि प्रवक्ता महतले निर्वाचनसँगै संसद् पुनर्स्थापनाको विकल्प खुला राखेर जान कांग्रेस तयार रहनुपर्ने सुझाव आएको जानकारी दिए। उनले भने, ‘निर्वाचन हुन्छ हुँदैन भन्ने कुरा पनि अन्योलमा परेको छ। हामीले संसद् पुनर्स्थापना बाटो पनि खुला राख्नुपर्छ।’
सरकार निष्पक्ष रूपमा चुनावको वातावरण बनाउन गम्भीर नदिखिएको कांग्रेसको ठहर छ। ‘संवैधानिक प्रबन्धअनुसार त यो सरकार बनेको होइन । तर, निर्वाचन गर्ने तिथिमिति तोकिएको छ । कांग्रेस जनतामा विश्वास गर्ने पार्टी हो, जनतामा जाने कुरालाई नकार्न सकिन्न । उनले भने, ‘जनतामा विश्वास गर्ने पार्टी हो, जनतामा जाने कुरा नकार्न सक्दैनौं । तर, सरकार निष्पक्ष रूपमा चुनावको वातावरण बनाउन गम्भीर देखिएको छैन । त्यसैले निर्वाचन गराउँछ कि गर्दैन हेर्नुपर्छ । संसद् पुनर्स्थापनाको बाटो पनि खुला राख्नुपर्छ ।’
गोली चलाउने आदेश दिएका थिएनौं : लेखक
कांग्रेसका नेता एवं निवर्तमान गृहमन्त्री रमेश लेखकले जेन–जी आन्दोलनमा बल प्रयोगका लागि आफूले कुनै आदेश नदिएको बताएका छन् । शुक्रबार कांग्रेस पार्टी कार्यालय सानेपामा सञ्चारकर्मीसँग कुरा गर्दै लेखकले आफू र प्रधानमन्त्री केपी शर्माले जेन–जी आन्दोलनलाई दमन गर्न गोली चलाउने अथवा अन्य कुनै आदेश नदिएको बताएका हुन् ।
गोली चलाउन प्रधानमन्त्री वा गृहमन्त्रीले आदेश गरेको भनेर चलेका चर्चाहरूमा सत्यता नरहेको उनले बताए । लेखकले जेन–जी आन्दोलनमा घुसपैठ भएका कारण पीडादायी घटना भएको धारणा राखेका छन् । जेन–जी पुस्ताले अघि सारेका मागहरूलाई बुझेर लोकतन्त्रको मूल्य मान्यतासाथ अघि बढ्न जरुरी रहेको उनले बताए । उनले अहिलेको अवस्थामा उत्तेजित, आग्रह, पूर्वाग्रह तथा प्रतिशोधबाट माथि उठेर मुलुकमा विधिको शासन स्थापित गरेर सबै राजनीतिक दल जिम्मेवारीसाथ अघि बढ्न जरुरी रहेको बताए । उनले राज्यका सबै निकायहरू कानुनसम्मत रूपमा चल्नुपर्नेमा जोड दिए
