: अमेरिकामा जारी सरकारी बन्दका बीचमा राष्ट्रपति डोनाल्ड ट्रम्प प्रशासनले डेमोक्र्याटलाई दबाब दिन हजारौँ संघीय सरकारी कर्मचारीलाई हटाउन थालेको छ।
ह्वाइट हाउस अफिस अफ म्यानेजमेन्टका निर्देशक रसेल भोटले एक्समा पोस्ट गर्दै भने, ʻआरआईएफ सुरु भएका छन्।ʼ आरआईएफको अर्थ ʻकार्यबलमा कमीʼ हो।
रसेल भोटको कार्यालयका प्रवक्ताले कर्मचारी कटौती सुरु भएको पुष्टि गर्दै यो महत्त्वपूर्ण भएको बताए।
प्रशासनले सात एजेन्सीमा ४,००० भन्दा बढी कर्मचारीलाई हटाउन थालेको खुलासा भएको छ।
राष्ट्रपति डोनाल्ड ट्रम्पले संघीय कार्यबल घटाउने आफ्नो लामो समयदेखिको लक्ष्य पूरा गर्न बन्दले सहयोग गरेको उल्लेख गरे।
अमेरिकी कानुन अनुसार संघीय सरकारले आफ्ना कर्मचारीलाई बर्खास्त गर्नु अघि कम्तीमा ३० दिनको सूचना दिनुपर्छ।
अमेरिकी सिनेट सरकारी खर्च सहमतिमा पुग्न असफल भएपछि सम्बन्धित विधेयक पारित हुन सकेन। यसले गर्दा अमेरिकामा बन्द भएको हो।
बन्दका लागि डेमोक्र्याट र रिपब्लिकन दुवैले एकअर्कालाई दोष लगाइरहेका छन्।
बन्द भएमा हजारौँ सरकारी कर्मचारीलाई बिना तलब बिदामा पठाइन्छ।
