: आसन्न निर्वाचनको तयारीका विषयमा अन्तरिम सरकार गम्भीर नभएको नेपाली कांग्रेसको ठहर छ। कांग्रेस प्रवक्ता प्रकाशशरण महतले पार्टी केन्द्रीय कार्यालय सानेपामा बसेको कांग्रेसको पदाधिकारी र पूर्वपदाधिकारी बैठकपछि सञ्चारकर्मीहरूसँग कुराकानी गर्दै फागुन २१ गते तोकिएको निर्वाचनको तयारीका लागि सरकारले सकारात्मक माहोल बनाउन नसकेको उनको आरोप छ।
प्रवक्ता महतले राष्ट्रपति रामचन्द्र पौडेलले आज बोलाएको दलहरूको बैठकमा यस विषयमा गम्भीर छलफल गरिने बताए।
'आसन्न निर्वाचनको तयारीका लागि सरकारले सकारात्मक माहोल बनाउन सकेन। सरकार गम्भीर हुन सकेन,'उनले भने,'यस विषयमा आज राष्ट्रपतिज्यूले दलहरूका प्रतिनिधिहरूलाई छलफलका लागि बोलाउनु भएको छ। सरकारका प्रतिनिधि प्रधानमन्त्री पनि उपस्थिति हुनुहुन्छ। त्यहाँ हाम्रा प्रतिनिधिहरूले यस विषयमा गम्भीरताका साथ आफ्ना कुराहरू राख्नुहुन्छ।'
नेता महतले जेनजी आन्दोलनका क्रममा घटेका घटनाको छानबिनका लागि आयोगले निष्पक्ष काम गर्नुपर्नेमा जोड दिए । आन्दोलनका क्रममा देशव्यापी घटेका घटनामा संलग्न जोकोहीलाई तत्काल कानुनको दायरामा ल्याउनुपर्ने उनको भनाइ छ।
उनले मुलुकको संविधान र कानुन बमोजिम सबैले आ-आफ्नो काम गर्नुपर्ने बताए। आजको बैठकमा पार्टीको आगामी रणनीति, नियमित अधिवेशनलगायत विषयमा छलफल केन्द्रित रहेको उनको भनाइ छ। बैठक भोलि पनि बस्नेछ।
