: सुनसरीको रामधुनी नगरपालिका-२ कर्मनिया टोलमा सिटी सफारी चालकको हत्या भएको छ। शनिबार साँझ सडक छेउमा रगताम्य अवस्थामा सफारी चालकको शव भेटिएको प्रहरीले जनाएको छ।
प्रहरीका अनुसार प्र-१-०२-००४ ह ७८०४ नम्बरको सिटी सफारीका चालक रामधुनी-२ का ४५ वर्षीय दिनेशकुमार चौधरी भित्री सडक खण्डमा उत्तरबाट दक्षिणतर्फ जाँदै गर्दा सवारी साधनदेखि करिब २०० मिटर उत्तरतर्फ रगताम्य अवस्थामा मृत फेला परेको जिल्ला प्रहरी कार्यालय सुनसरीका डीएसपी योगराज खतिवडाले बताए।
घटनाको जानकारी प्राप्त हुनासाथ प्रस्तावित इलाका प्रहरी कार्यालय रामधुनीका प्रमुख प्रहरी निरीक्षक सुजन मुदेलको कमाण्डमा प्रहरी टोली तत्काल घटनास्थल पुगेको थियो। घटनास्थलमै चौधरीको मृत्यु भइसकेको पुष्टि भएपछि जिल्ला प्रहरी कार्यालय सुनसरीका प्रमुख प्रहरी उपरीक्षक (एसपी) केशवकुमार थेबे नेतृत्वको टोली पनि थप अनुसन्धानका लागि घटना स्थल पुगेको थियो।
प्रारम्भिक अनुसन्धानका क्रममा मृतकको बायाँ छातीमा गहिरो चोट लागेको र शरीरमा रगत बगेको फेला परेको प्रहरीले जनाएको छ। घटनाको प्रकृति हेर्दा गोली प्रहार गरी चौधरीको हत्या गरिएको हुनसक्ने आशंका गरिएको छ।
मृतकको छातीमा गहिरो चोट र घटनास्थलको अवस्थाले हेर्दा सबैले गोली प्रहारको अनुमान गरेका छन्। घटना स्थलमा प्रहरीले कानुनी प्रक्रिया पूरा गरी चौधरीको शवलाई पोष्टमार्टमका लागि बीपी कोइराला स्वास्थ्य विज्ञान प्रतिष्ठान धरान पठाइएको छ।
घटनापछि स्थानीय बासिन्दा त्रसित बनेका छन्। प्रहरीले घटनास्थल वरपरको क्षेत्र सिल गरी व्यापक अनुसन्धान सुरु गरेको डीएसपी खतिवडाले बताए।
