: गोरखामा काम गर्न आएका रसुवाका छेवाङ नाम्ग्याल तामाङ मृत भेटिएका छन्। चिनियाँ सरकारको सहयोगमा सहिद लखन गाउँपालिका-४ स्थित सिंजाली माविको नयाँ भवन निर्माणमा कार्यरत तामाङ शनिबार बिहान मृत भेटिएका हुन्।
गोसाइँकुण्ड गाउँपालिका-३ रसुवाका ३५ वर्षीय तामाङ शनिवार बिहान सुतेकै ठाउँमा मृत अवस्थामा फेला परेका प्रहरी नायब उपरीक्षक राजकुमार श्रेष्ठले जानकारी दिए। बिहान अबेरसम्म नउठेपछि प्रधानाध्यापकले प्रहरीमा खबर गरेका थिए। प्रहरी सहायक निरीक्षक उमेश यादवको कमान्डमा गएको प्रहरी टोलीले कोठाको ढोका खोलेर हेर्दा तामाङ मृत अवस्थामा फेला परेको डीएसपी श्रेष्ठले बताए।
नेपालका १० विद्यालय निर्माण गर्ने पूर्व घोषित कार्यक्रमअनुसार चीन सरकारले सो विद्यालय भवन निर्माण गरिरहेको छ। तामाङले भवन निर्माणमा खटिएका चिनियाँहरूका लागि दोभाषेको काम गर्ने गर्थे। घटनाबारे थप अनुसन्धान भइरहेको जिल्ला प्रहरी कार्यालयले जनाएको छ।
