। अमेरिकी राष्ट्रपति डोनाल्ड ट्रम्पले सोमबार इजरायलको संसद्मा सम्बोधन गरे । इजरायली प्रधानमन्त्री बेन्जामिन नेतन्याहूको भाषणपछि ट्रम्पले सम्बोधन गरेका थिए ।
इजरायल–गाजा युद्धको प्रसंग उठाउँदै ट्रम्पले अब मध्यपूर्वमा शान्ति कायम भएको बताए र त्यो सँधै कायम रहनेछ भन्ने विश्वास व्यक्त गरे ।
ट्रम्प बोलिरहँदा इजरायली संसद्मा सोमबार एकैछिन ‘हंगामा’ भयो । जसका कारण ट्रम्पले केहीबेर आफ्नो भाषण नै रोक्नुपर्यो ।
खासमा ट्रम्प बोलिरहँदा इजरायली विपक्षी दलका एक सांसदले एउटा कागज देखाए । जसमा लेखिएको थियो– ‘प्यालेस्टाइनलाई मान्यता देऊ ।’
लगत्तै मर्यादापालकले ती सांसदलाई संसद्बाट बाहिर निकालिदिए । प्यालेस्टाइनलाई मान्यता दिनुपर्ने लेखिएको कागज देखाउने सांसदलाई तत्कालै बाहिर निकाल्न मर्यादापालकको सक्रियता देखेरे ट्रम्पले भने, ‘त्यो त निकै छिटो भयो ।’ त्यसपछि ट्रम्पले आफ्नो सम्बोधन जारी राखे ।
सम्बोधनका क्रममा ट्रम्पले इजरायली प्रधानमन्त्री नेतान्याहूलाई धन्यवाद दिए । इजरायल र हमासबीच युद्धविराम सम्झौता गराउन मध्यस्थता गरेका अरब देशहरू इजिप्ट, कतार, टर्कीलाई पनि ट्रम्पले धन्यवाद दिए ।
ट्रम्पले भने, ‘मध्यपूर्वमा अराजकता, आतंक र बर्बादीका शक्तिहरू, जसले दशकौंदेखि यस क्षेत्रलाई त्रस्त बनाए, अब कमजोर, अलगथलग र पूर्णरूपले हारेका छन् ।’
यस वर्ष इरानको तीन परमाणु केन्द्रमा अमेरिकाले आक्रमण गरेको प्रसंग कोट्याउँदै ट्रम्पले भने, ‘इरानमा आक्रमण नगरिएको भए गाजामा शान्ति सम्झौता सम्भव थिएन ।’
