: अष्ट्रेलियामा खेलिरहेको तीन खेलको एकदिवसीय शृङ्खलाको पहिलो खेलमा भारतले सात विकेटको हार बेहोरेको छ।
अष्ट्रेलियाले टस जितेर पहिला फिल्डिङ रोजेको थियो। पहिले ब्याटिङ गरेको भारतको सुरुवात खराब रह्यो। पचास रन नपुग्दै आफ्नो सम्पूर्ण शीर्ष क्रम गुमायो।
भारतको इनिङ वर्षाले प्रभावित भयो र खेल धेरै पटक रोकियो। त्यसपछि खेल ५० ओभरबाट घटाएर २६ ओभरमा झारियो।
निर्धारित ओभरमा भारतले ९ विकेट गुमाएर १३६ रन मात्र बनायो तर डकवर्थ लुइस नियमका कारण अष्ट्रेलियालाई १३१ रनको लक्ष्य मिल्यो।
अस्ट्रेलियाका लागि जोश हेजलवुड, मिचेल ओवेन र म्याथ्यू कुनम्यानले समान २–२ विकेट लिए।
यसैबीच अस्ट्रेलियाले २१.१ ओभरमा मात्र तीन विकेट गुमाउँदै लक्ष्य पूरा गर्यो। अस्ट्रेलियाका लागि कप्तान मिचेल मार्शले अविजित ४६ रनको योगदान दिए।
यस इनिङका लागि मिचेल मार्शलाई खेलको उत्कृष्ट खेलाडी चुनिएको छ।
रोहित–विराटको चलेन ब्याट
रोहित शर्मा र विराट कोहली धेरै समयदेखि नीलो जर्सीमा सँगै देखिएका छन्। उनीहरूले अन्तिम पटक मार्च २०२५ मा च्याम्पियन्स ट्रफीको फाइनलमा भारतका लागि खेलेका थिए।
दुवै ब्याट्सम्यानले अन्तर्राष्ट्रिय टेस्ट र टी–२० क्रिकेटबाट सन्न्यास लिइसकेका छन्। अब उनीहरु भारतका लागि एकदिवसीय (ओडीआई) मात्र खेल्छन्।
इनिङको सुरुवात गर्दै रोहित शर्माले १४ बलमा केवल ८ रन बनाए। दोस्रो स्लिपमा तेज बलर जोश हेजलवुडको बलमा म्याट रेनशको हातबाट क्याच आउट भए।
रोहित आउट भएपछि भारतको दोस्रो विकेट विराट कोहलीको भयो। विराटले स्टार्कको बल अफ स्टम्पभन्दा बाहिर लैजाँदै गर्दा ब्याकवार्ड पोइन्टमा उभिएका कूपर कोनेलीले उत्कृष्ट क्याच लिए।
विराट आफ्नो खाता नखोलीकनै पेभिलियन फर्किए र भारतले केवल २१ रनको स्कोरमा दुई विकेट गुमायो।
रोहित र कोहली दुवैको पुनरागमनले भारतको अपेक्षा पूरा गर्न सकेन।
भारतीय ब्याटिङको फ्लप शो
केएल राहुल (३८) र अक्षर पटेल (३१) बाहेक अन्य सबै ब्याट्सम्यानले अस्ट्रेलियाली बलरहरू विरुद्ध संघर्ष गरे।
भारतका शीर्ष तीन ब्याट्सम्यान कप्तान शुभमन गिल (१०), रोहित शर्मा (८) र विराट कोहली (०) ले जम्मा १८ रन मात्र बनाए।
त्यसपछि श्रेयस अय्यर (११) ले रन बनाए। तर हेजलवुडको तीव्र र खतरनाक सर्ट बलमा उनी क्याच भए।
एकदिवसीय डेब्यू गरिरहेका नितिश रेड्डी १९ रनमा अविजित रहे। उनले आफ्नो इनिङमा दुई छक्का प्रहार गरेका थिए।
