— फ्रान्सको पेरिसस्थित विश्वप्रसिद्ध लुभ्र संग्राहलयमा भएको चोरीमा संलग्नहरूको अनुसन्धानका लागि १५० भन्दा बढी डीएनए र 'फिंगरप्रिन्ट'(औंठाछाप)को नमुना संकलन गरिएको छ । अनुसन्धानरत अधिकारीहरूले डकैतीमा संलग्नको खोजीका लागि १५० भन्दा बढी डीएनए र 'फिंगरप्रिन्ट'को नमुना संकलन गरेका हुन् ।
बेलायती अखबार द गार्डियनका अनुसार घटनास्थलमा छोडिएका उपकरणहरूबाट १५० भन्दा बढी डीएनए र 'फिंगरप्रिन्ट'का नमुनाहरू संकलन गरिएको हो । जसमा हेलमेट र पन्जा पनि समावेश छन् ।
गत १८ अक्टोबरमा फ्रान्सको ऐतिहासिक सम्पदाको परिचित नेपोलियन र उनका पत्नीहरूसँग सम्बन्धित बहुमूल्य रत्नहरू चोरी भएको थियो ।
सन् १८५५ मा नेपोलियन तृतीयकी पत्नी महारानी युजेनी डे मोन्टीजोको लागि बनाइएको हजारौँ बहुमूल्य रत्नहरूले जडित ऐतिहासिक युजेनी क्राउन (टियारा), एक हार र एउटा ब्रोचसहित नौ बहुमूल्य रत्नहरू चोरी भएको अन्तर्राष्ट्रिय सञ्चारमाध्यम बीबीसीले जनाएको छ ।
फ्रान्सेली सरकारी वकिल लोर बेक्कुओलाई उदृत गर्दै अन्तर्राष्ट्रिय सञ्चारमाध्यमहरूले चोरी भएका गहनाहरूको मूल्य ८८ मिलियन युरो पर्ने जनाएको छ ।
प्रारम्भिक अनुसन्धान अनुसार, चोरीमा तीनदेखि चार जना संलग्न रहेको अन्तर्राष्ट्रिय सञ्चारमाध्यमले जनाएका छन् । अन्तर्राष्ट्रिय सञ्चारमाध्यम अल-जजिराका अनुसार ४ देखि ८ मिनेटभित्र यो चोरी भएको हो । अनुसन्धानकर्ताका अनुसार चोरी गर्नेहरूले भाग्ने क्रममा युजेनीको क्षतिग्रस्त मुकुट (युजेनी क्राउन/टियारा) को केही टुक्रा बाटोमा छाडेका थिए ।
