— केरामा विषादी प्रयोग गरेको आरोपमा प्रहरीले एक जना व्यक्तिलाई नियन्त्रणमा लिएको छ ।
वीरगन्ज महानगरपालिका–९ घण्टाघरमा बिक्री वितरणका लागि राखिएको केरामा विषादी मिलाएको भनी गोप्य सूचनाका आधारमा वीरगन्ज–११ का २६ वर्षीय मनैयाकुमार रौनियार पक्राउ परेका हुन् । अस्थायी प्रहरी पोस्ट घण्टाघरबाट खटिएको प्रहरी टोलीले शनिबार राति ९ बजेको समयमा उनलाई पक्राउ गरेको हो ।
करिब चार सय किलो केरासहित उनलाई नियन्त्रणमा लिएको छ । उनलाई आइतबार जिल्ला अदालतमा पेस गरी ५ दिन म्याद थप गरी अनुसन्धान जारी राखिने पर्सा प्रहरी प्रवक्ता डीएसपी हरिबहादुर बस्नेतले जानकारी दिए।
हाल जारी छठ पर्वको समयमा केराको अत्यधिक माग हुने गर्छ । व्यापारीले काँचो केरा छिटो पकाउनका लागि केरामा विषादी प्रयोग गर्ने गर्छन् ।
