: नियमित चेकजाँचपछि सुत्केरी गराउन अस्पताल भर्ना भएकी खोटाङकी मीना राईको शुक्रबार राती मृत्यु भएपछि किष्ट अस्पतालमा तनाव भएको छ। अस्पतालको गल्तीले सुत्केरीको मृत्यु भएको भन्दै मृतकका आफन्तले अस्पताल तोडफोड र आगजनी गरेका छन्।
जिल्ला प्रहरी परिसर ललितपुरका प्रवक्ता चक्रराज जोशीका अनुसार मृतकका आफन्तले ललितपुरको इमाडोलमा रहेको किष्ट अस्पताल तोडफोड गरेका छन्। अस्पतालको गेट फोडेर भित्र पसेका प्रदर्शनकारीले अस्पतालमा ढुंगामुढा गरेका थिए।
स्थितिलाई नियन्त्रणमा लिनका लागि प्रहरीले केही राउण्ड अश्रुग्याँस प्रहार गरेको छ। अस्पतालमा तोडफोड र आगजनी गर्नेविरुद्ध लाठीचार्ज पनि भएको थियो। प्रदर्शन उग्र बनेपछि प्रहरीले भीडलाई तितरबितर बनाउन लाठीचार्ज गर्नुका साथै केही राउन्ड अश्रुग्याँस समेत प्रहार गरेको प्रवक्ता जोशीले बताए।
अस्पताल प्रशासनले भने सुत्केरी भइसकेपछि उच्च रक्तस्राव भएका कारण मिनाको मृत्यु भएको बताएको छ। शुक्रबार साँझ उनले छोरीलाई जन्म दिएकी थिइन्। बच्चाको अवस्था सामान्य रहेको छ।
अस्पताल प्रशासनले मृतकका आफन्तसँग पटकपटक वार्ता गर्ने प्रयास गरेको थियो। तर वार्ता सफल भएन। सोमबार दिउँसो पीडित परिवारले प्रशासनको रोहवरमा वार्ता गर्ने भन्दै विरोध गरिरहेका थिए। यसका लागि जिल्ला प्रशासन कार्यालय ललितपुरको रोहवरमा वार्ता गरेर पीडितका माग पुरा गर्नुपर्ने उनीहरूले बताएका छन्।
के भएको थियो किष्ट अस्पतालमा ?
प्रहरीका अनुसार खोटाङको हलेसी तुवाचुङ नगरपालिका–९ की ३४ वर्षीया मिना राई नियमित रूपमा किष्ट अस्पतालमै चेकजाँच गराइरहेकी थिइन्। चिकित्सकले दिएको मितिमै गत शुक्रबार बिहान ९ बजेतिर उनी अस्पताल पुगेकी थिइन्। सोही दिन राती ९ बजे छोरीलाई जन्म दिएकी मिनाको सुत्केरी भएपश्चात् रक्तस्राव रोकिएको थिएन। मृतकका आफन्तका अनुसार उपचारका क्रममा उनको २ पटक अपरेसन गरिएको थियो। अस्पतालमै इन्टर्नसिप गरिरहेका डाक्टरले सुत्केरी गराउँदा लापरबाही गरेर सुत्केरीको मृत्यु भएको पीडित परिवारको आरोप छ।
नर्मल डेलीभर भएर छोरीलाई जन्म दिएकी मिनाको अस्पतालको लापरबाहीका कारण मृत्यु भएको भन्दै पीडित परिवारले प्रदर्शन गरेका हुन्। शनिबार, आइतबार र सोमबार पनि उनीहरूले अस्पताल परिसरमा प्रदर्शन गरे। मृत्युको कारण थाहा पाउन पटकपटक अस्पताल प्रशासनमा अनुरोध गर्दा अस्पतालले बल प्रयोग गरेको मृतकका आफन्तको आरोप छ।
