— दक्षिण अफ्रिकी क्रिकेट हस्ती फाफ डु प्लेसिसले विराटनगर किंग्सबाट नेपाल प्रिमियर लिग (एनपीएल) को दोस्रो संस्करण खेल्ने भएका छन् । एनपीएलको फ्रेन्चाइज टोली विराटनगरले शुक्रबार उनलाई आवद्ध गरेको जनाएको हो । दोस्रो सिजनको एनपीएल मंसिर १ देखि सुरु हुँदै छ ।
डु प्लेसिसले दोस्रो हाफमात्र आएर खेल्ने विराटनगर किंग्सका निर्देशक दीपेन्द्र चौधरीले बताए । अबुधाबी टी– १० मा खेल्ने हुनाले उनले सुरुआती खेल गुमाउने चौधरीले जनाए । अबुधाबी टी–१० को नवौं सिजन नोभेम्बर १८ देखि ३० सम्म हुनेछ । डु प्लेसिसले अबुधाबीमा भिस्टा राइडर्सबाट खेलिरहेका छन् ।
‘फाफ डु प्लेसिस जस्ता विश्वस्तरीय खेलाडी आउनु विराटनगर किंग्स र एनपीएलका लागि गर्वको कुरा हो, उनको आगमनले आउदो दिनमा नेपालमा विश्व स्तरीय खेलाडी आउन अझ उत्साही बनाउने छ,’ चौधरीले दक्षिण अफ्रिकाका पूर्व कप्तानबारे भने ।
डु प्लेसिसले सन् २०११ मा भारतविरुद्ध एकदिवसीय अन्तर्राष्ट्रिय र २०१२ मा अस्टेलियाविरुद्ध टेस्टमा ‘डेब्यु’ गरेका थिए । दुवैमा अर्धशतक बनाएका थिए । उनले ६९ टेस्टमा ४ हजारभन्दा बढी रन र १ सय ४३ एकदिवसीय अन्तर्राष्ट्रियमा ५ हजार ५ सयभन्दा बढी रन बनाइसकेका छन् । साथै उनले ५० ट्वान्टी–२० अन्तर्राष्ट्रियमा १५ सयभन्दा बढी रन बनाएका छन् ।
उनको व्यवस्ता ग्लोबल फ्रेन्चाइज प्रतियोगितामा अझ बढी छ । उनले विश्वभरका लगभग सबै फ्रेन्चाइज लिग खेल्दै आएका छन् । उनले २०१८ र २०२१ मा चेन्नई सुपर किंग्सबाट इन्डियन प्रिमियर लिग (आईपीएल) को उपाधि जितेका थिए । २०१२ मा आएका उनले चेन्नईबाट २०२१ सम्म खेले । २०२२, २३, २४ रोयल च्यालेन्जर्स बेंग्लोरबाट खेलेका डु प्लेसिसले पछिल्लो आईपीएल दिल्ली क्यापिटल्सबाट खेलेका थिए ।
