— तान्जानियाकी राष्ट्रपति सामिया सुलुहु हसनले कडा सुरक्षाबीच दोस्रो कार्यकालका लागि शपथ लिएकी छिन् । शनिबार सार्वजनिक मतपरिणामअनुसार ९८ प्रतिशत मत ल्याएर उनी विजयी भएकी हुन् ।
यद्यपि, विपक्षीहरूले यसलाई झुठो र देखावटी निर्वाचनका रुपमा टिप्पणी गरेका छन् । अधिकांश विपक्षी दलहरूले यस निर्वाचनमा सहभागिता जनाएका थिएनन् ।
कतिपय विपक्षीलाई सहभागी हुनबाट रोक लगाइएको थियो भने केही विपक्षीलाई जेलमा राखिएको छ । त्यस्तै, निर्वाचन अवधि र त्यसपछि हिंसा भड्किँदा यहाँ सयौंको मृत्यु भएको छ ।
अन्तर्राष्ट्रिय पर्यवेक्षकले निर्वाचनको पारदर्शीता र यस दौरान भएको हिंसाबारे चिन्ता व्यक्त गरेका छन् । दक्षिणी अफ्रिकी क्षेत्रीय निकाय (एसएडीसी) का निर्वाचन पर्यवेक्षकहरूले विज्ञप्ति निकाल्दै अधिकांश इलाकामा मतदाताले आफ्नो प्रजातान्त्रिक इच्छाशक्ति अभिव्यक्त गर्न नसकेको जनाएको छ । विपक्षीमाथि लगाइएको रोकबारे पनि यसले उल्लेख गरेको छ ।
