— विशेष महाधिवेशन माग राखेर हस्ताक्षर गर्ने नेताहरूले पार्टी नेतृत्वलाई निर्वाचनअगाडि नै विशेष महाधिवेशनको निर्णय लिन आह्वान गरेका छन् ।
नेतृत्व र नीति परिवर्तन नगरी निर्वाचनमा जान नसकिने भन्दै उनीहरूले अब नियमित महाधिवेशन नभएर विशेष महाधिवेशन बोलाउनुपर्ने बताएका छन् ।
थापागाउँस्थित एक ब्यांक्वेटमा आयोजना गरिएको संस्थापन इतरपक्षको महाधिवेशन प्रतिनिधिको भेलामा बोल्ने अधिकांश नेताहरूले कुनै पनि बहानामा विशेष महाधिवेशन टार्न नमिल्ने बताएका छन् ।
मंगलबारबारको केन्द्रीय कार्यसमिति बैठकमा भने महामन्त्री गगन थापाले पुस १६ र १७ गते केन्द्रीय महाधिवेशन सम्पन्न गर्नेगरी कार्यतालिका प्रस्तुत गरेका छन् ।
महामन्त्रीको प्रस्तावित कार्यतालिकालाई सहमतिको नभएर व्यक्तिगत रहेको भन्दै संस्थापन पक्षले पनि छुट्टै कार्यतालिका प्रस्तुत गरेको छ । महामन्त्री थापाले बोल्नसाथ संस्थापन पक्षबाट सहमहामन्त्री महेन्द्रराय यादवले वैशाख २७–३० को कार्यतालिका प्रस्तुत गरेका हुन् ।
केन्द्रीय कार्यसमितिमा निर्वाचन अगाडि कि पछाडि भन्ने विवाद बढिरहेका बेला यता संस्थापनइतरपक्षका महाधिवेशन प्रतिनिधिको भेलाले भने तत्काल विशेष महाधिवेशनको तिथि तोक्ने दबाव दिएका हुन् ।
काठमाडौंमा उपलब्ध महाधिवेशन प्रतिनिधिको भेला बोलाइए पनि देशभरबाट महाधिवेशन प्रतिनिधि जम्मा भएका थिए । विशेष महाधिवेशनको अगुवाइ गर्ने नेता देवराज चालिसेका अनुसार काठमाडौंमा उपलब्ध महाधिवेशन प्रतिनिधिको भेलामा करिब एक हजारको सहभागिता रहेको बताए ।
